Omulumentu anuwa a tindilwa ooN$7 000 ndhoka a sindana mokundombola

Omukalimo gwomOvenduka Frans Amukwaya (38) okwa holola okwaauvanawa kombinga ya mwene gwondingosho yi li momudhingoloko gwaChina Town, ngoka anuwa a tinda oku mu pa oshimaliwa she shooN$7 000 sho a sindana meshina lyokundombola momasiku 25 gaNovemba.

“Aapolisi mboka oyo ya gwana okutugamenenapo oyo ishewe taye tu yugu iinima yetu,” osho a popi ngaaka.

Amukwaya okwa popi kutya mwene gwondingosho ndjoka omupolisi.

“Ota longitha pambambo oonkondo dhe molwashoka okushi kutya ye omupolisi e na onkatu yopombanda,” osho a popi ngaaka.

Amukwaya okwa popi kutya esiku ndyoka petameko okwa ndombola nokukanitha ooN$700 mondingosho ndjoka, nolwanima elago olye ya sho sinanda oshimaliwa shoka shooN$7 000.

Okwa hokolola kutya okwa kala ta ndombola muule womimvo 10 dha piti nolundji oha sindana oshimaliwa.

Otaku hokololwa kutya mwene gwondingosho okwa popi kutya haye mwene gwomashina gokundombola.

“Esiku lya landula ko, onda lombwelwa kutya mwene gwomashina ngoka gokundombola okwe ga kutha mo mondingosho ndjoka, nokwa popi kutya eshina lyokundombola ndyoka lya pendje esindano onde li kengelela.

Ashike ngame shoka nda hala, oshimaliwa shandje owala shoka nda sindana molwashoka shoka ta ningi kashili mondjila,” osho a popi ngaaka.

Sho a kwatathanwa naye oshiwike shika, kakukutu gwetanga lyopolisi Joseph Shikongo okwa popi kutya yo ihaya longo niipotha ngambyoka.
“Kapuna ngoka e na oonkondo dhi vule oveta.

Ashike nando ongaaka, aapolisi oya pitikwa okukala noongeshefa dhawo shampa ashike tadhi kala dha shangithwa nodhina omikanda, osho wo okukala ya pewa epitikilo okuza kukakukutu gwetanga lyopolisi, minista osho wo okushilipaleka kutya ongeshefa ndjoka oyi li paveta,” osho a popi ngaaka.

Omulumentu gwedhina ‘Pius’ ngoka oye taku hokololwa oye mwene gwomashina gokundombola ga li mondingosho ndjoka, okwiikala omashina ngoka nokupopya kutya kageshi ge – sho a pulwa konzonkundaneki ndjika. Pius okwa lombwele The Namibian a pule uuyelele wa mwene gwomashina okuza kumwene gwondingosho.

Ashike nando ongaaka, mwene gwondingosho, ngoka a tindi edhina lye li tumbulwe moshifonkundaneki shika, okwa popi kutya Pius okwa kutha mo omashina ge gokundombola mondingosho ye.

“Ishewe (Pius) ina hala we okukutha po ongodhi yandje uuna tandi mu dhengele,”osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.