Omulumentu a mana oondjenda sho a ponokelwa kondjambameya

Omulumentu gwomimvo 26 okwa mana oondjenda ongula yEtitatu lya zi ko moshipangelo shepangelo shaRundu, sho taku hokololwa e ehamekwa noonkondo kondjambameya ndjoka ye mu ponokele mEtiyali momukunda Shitemo moshitopolwa shaKavango Uuzilo.

Omulumentu ngoka otaku hokololwa kutya okwa li ha longo ongomukeeleli gwomaliko moshikunino shedhina Shitemo Green Scheme.

Nakusa Likuwa Kudumo otaku hokololwa a li mokawato ta fala mumwayina, Eldraud Muronga opamwe nokanona ke opo ya ka tyaye iikuni kokatuntu ke li mokati komulonga gwaKavango sho ya ponokelwa kondjambameya.

“Omanga mboka yaali ye li mengwangwano, okawato moka ya li oku undulilwa mombanda kondjambameya, nondjambameya ndjoka oya ponokele nakusa noku mu kokota montulo,” osho komanda ta kwathele moshitopolwa shaKavango Uuzilo, Eino Nambahu, a popi ngaaka.

Nambahu okwa popi kutya ondjambameya oyu umbile Kudumo komukunkulo gwomulonga, hoka Kudumo e shi pondola okuza mo momeya.

“Mumwayinakadhona gwanakusa okwe shi pondola okuyoga sigo okumotunda opamwe nomwana, ngoka hambala a se omeya,” osho Nambahu a popi ngaaka.

Kudumo namumwayinakadhona okwa li ya kwathelwa okukuthwa mo mokatuntu hoka ke li pokati komulonga komukwashigwana gulwe nokawato noya falwa kokapangelo kaNyangana nolwanima oya falwa koshipangelo shaRundu.

Omupangi omukuluntu moshipangelo shaRundu, Peter Kawali, okwa lombwele onzonkundaneki ndjika kutya Kundumo okwa li e ehamekwa noonkondo kokugulu kokolulyo, naashoka okwa li she eta okugulu kwe ku tetwe ko.

Konima yetando, Kundumo okwa taambelwa kokoma hoka a manene oondjenda ongula yEtitatu.

Omupopiliko gUuministili wOmidhingoloko, Omakuti nOmatalelopo, Romeo Muyunda, okwa koleke oshiningwanima shoka, ashike ina vula okugandja uuyelele womuule.

Aakwashigwana mboka ye li popepi nomulonga olundji ohaya ningi iihakanwa yoondjambameya noongandu molwashoka oyendji yomuyo ohaya hupile momeya gomulonga ngaashi okuyula oohi, okuteka omeya, okwiiyoga osho wo okuyoga iikutu yawo.

Omumvo gwa zi ko, Muyunda okwa lombwele onzonkundaneki ndjika kutya uuna omuntu a ningilwa omuyonena kiinamwenyo oha futwa kepangelo ashike nando ongaaka ohaku ningwa tango omakonakono.

“Iipumbiwa ayihe oyi na okukala ya gwanithwa po okutala ngele onkalo ndjoka oye etithwa [koshiyamakuti] nenge pamwe uuhasha owala wa nakuninga oshihakanwa,” osho a popi ngaaka.

Muyunda okwa popi kutya omulandu ngoka gwa talululwa gwomaipumomumwe pokati kaantu niinamwenyo, nofuto yaamboka ya dhipagwa nenge ya monithwa iiponga kiinamwenyo otagu utha egandjo lyooN$50 000 uuna omuntu a lemanekwa, osho wo ooN$100 000 kaakwanezimo yanakusa ngoka a kuthwa omwenyo koshinamwenyo.