Omulumenhu wokOshakati, ta tamanekelwa okukwata omutoolinghundana ongonga, ota tamanekelwa vali okuningila mumwaina wanakuningwa oshihakanwa omatilifo nondjebo, konima kwa li a lombwelwa kutya nakuningwa oshihakanwa okwa ninga eteelelo.
Gabriel Nambahu, oo e na oaputeka kOshakati, okwa li a holoka mOmhangu yaMangestra kOshakati Omaandaxa konima eshi kwa li a mangwa po mexuliloshivike shi na sha nekwatongonga.
Opolifi oya ti oshiningwanima eshi osha ningilwa mOshakati kEkuku moshivike shotete shaJuni.
Oya ti omukainhu, oo a kala e shi Nambahu oule weedula hamano, okwa li a ya keumbo laye konima e mu shiva va ka nwe mo.
Vati okwa fiya po okakunwa kaye oko a pewa kuNambahu manga a ya kokandjuwo.
Eshi aaluka, okwa twikila nokunwa nokonima yokafimbo kaxupi okwa tameka ta i etelele, ta kanifa eenghono yee ita dulu nokweenda.
“Okwa pula onduda a fude po nokonima okwa kofa.
Otaku tiwa vali lwomokati koufiku, nakuningwa oshihakanwa okwa penduka noilyo yaye yopaumwe okwa li tai luluma.
“Eshi a pula omutamanekwa, vati okwa itavela kutya okwa nangala naye,” olopota yopolifi tai ti.
Omutoolinghundana okwa lombwela opolifi kutya oshinima eshi osha ningwa ina yandja ediminino manga kwa li ehe shii apa eli.
Opolifi oya ti lwopexulilo laJuni, konima eshi ina ya pedu, okwe li konakona ngee oku na eteelelo.
She likolelela kopolifi, Nambahu konima okwe mu pa eepela, te mu lombwele kutya ohadi kufa mo omateelelo ndee te mu endifa po kutya ohadi longifwa ngahelipi.
Eshi a nwa eepela. Omukainhu vati okwa kala nokudja ohonde neenghono oule woivike itatu lwaapo.
Natango opolifi oya ti Nambahu okwa li a ya keumbo lanakuningwa oshihakanwa nomulumenhu umwe momafiku 13 Juli, konima mumwaina wanakuningwa oshihakanwa e mu dengela e mu lombwele kutya omutoolinghundana oku na eteelelo.
“Eshi a pulwa a twale nakuningwa oshihakanwa koshipangelo, omutamanekwa vati okwa nukila pomutenya ndee ta handuka.
Vati okwa kufa ondjebo motuwa yaye ndee ta lombwele mumwaina wanakuningwa oshihakanwa ehe mu piyaaneke vali,” opolifi tai ti.
Omutoolinghundana okwa konga eyambidido lopaunamiti momafiku 16 Juli, nomakonakono okwa mona kutya moshidalelo shaye kamu na sha.
Konima okwa ka lopota oshinima eshi kopolifi.
