Omupangi oo taku tiwa okwa denga omukainhu eshi a kala omutumba kokambete oko kwa li ku na okaana kaye ke udite nai moshipangelo mOkahandja okwa tulilwa mo oshipofa.
Omukulunhu wopolifi mOkahandja inspekta Mathias Tjarimba okwa koleka oshipofa eshi, ta weda po kutya omakonakono ee li metifa opo kwoongelwe ouyelele aushe wa dingilila oshiningwanima eshi.
“Aveshe ove li poshitaashi opo tu ude kutya oshike lela sha ningwa po nokumona ou e na ondjo ile ngee otava pewa ehandukilo. Kapu na eshi sha tokolwa po natango,” Tjarimba ta ti.
Oshiningwanima eshi vati osha ningwa Oshoondaxa monduda younona, omo Tusnelde Matheus (30) a kala nokaana kaye keemwedi 11, oko kwa li ka tambulwa moshipangelo Etitano.
She likolelela komushamane waMatheus, Petrus Ngidengwa (32), omupangi, ta ifanwa Nehale, okwa pula Matheus a yandje oshipundi osho kwa li ta longifa opo shi ka longifwe kovanaudu vamwe.
Konima oshipundi sha kufwa po Matheus vati okwa kala omutumba kokambete kokaana kaye opo a nyamife shaashi inashi alulwa diva.
“Okwa yaamena ko ashike shaashi okaana okwa li taka kwena.
Omupangi eshi e ya okwa tameka ta tanguna ta ti ina pitikwa a kale omutumba kokambete,” Nghidengwa osho a lombwela oThe Namibian ngaho.
Okwa ti kutya omupangi okwa kendabala okukufa ko okaana manga ina alula oshipundi momukalo uhe shii uwa nandenande.
Nghidengwa okwa koleka kutya okabete okashona unene, oka nuninwa ashike ounona. Ashike Matheus okwa ti okwa li ashike a yaamena ko shaashi itaka dulu oshivixa shomukulunhu.
“Eshi twa ka tala oshipundi eshi a kufa omukulukadi wange, okwe shi undulila konima yaye.
Omukulukadi wange okwa pula kutya omolwashike e mu pa oshipundi nombili ndee ote shi alula a handuka,” osho a ti ngaho.
Omupangi vati okwe mu lombwela kutya oshipundi kashi shii shaye yee ina dja nasho keumbo, Nghidengwa ta ti.
Okwa ti vati Matheus oshipundi ine shi tambula shaashi okwa li e shi pewa momukalo uhe shii uwa ndee ta pewa shimwe komunhu oo ve li naye monduda omo.
“Konima, omwe ya omupangi umwe a pule kutya otu li po ngahelipi.
Omukulukadi wange okwe mu lombwela kutya ke udite nawa shaashi okwa handukifwa komupangi umwe,” osho a ti ngaho.
Ngidengwa okwa ti kutya Nehale okwa uda eshi tava popi, te ya monduda omo, ndee ta ningile Matheus omatilifo oku mu denga, te mu pe enghava.
Okwa ti Matheus okwe mu shunina ndee manga tava kondjo omupangi te mu lumata.
Matheus vati okwa li a dinda moshipala. “Ashike paife oku li nawa,” Nghidengwa ta ti.
Oshinima eshi okwa li nee sha lopotwa komukulunhu woshipangelo Maureen Gawises, ashike vati okwa pula ashike ehokololo kuMatheus ndee te mu lombwele kutya Nehale ote mu hange nale.
Matheus aveshe naNehale okwa li va ifanwa kopolifi mOkahandja Omaandaxa, oko Nehale naye a lopota oshipofa shedengo.
“Opolifi oya dengela omukulukadi wange onghela tai mu lombwele kutya okwa patululilwa oshipofa na ye kopolifi omanga natango kwa li e li nokaana kehe udite nawa,” Nghidengwa ta ti.
