Uuministili wIikwamina nIikwankondo owa popile otendela yoomwedhi ndatu ndjoka ya pewa ehangano lyedhina Vitol okweeta omahooli moshilongo, sho wa popi kutya hayo nande yina okupelwombedhi onkalo ndjoka yi li moshilongo ngashingeyi yompumbwe yomahooli goondhila dhoJet.
Omaandaha goshiwike sha zi ko, otenga yomahooli goondhila dhoJet ndjoka ya thiki pomatulilo goosikepa mOmbaye oya kalekwa othika omolwomakonakono gongushu yomahooli ngoka.
Onkalo ndjoka oye eta ngaashi ehangano lyoondongelwa lyedhina Lufthansa Cargo li kaleke iilonga yokutukitha oondongelwa dhawo osho wo ehangano lyoondhila lyedhina Discover Airlines li tumine oondhila dhawo dhi ka nwithwe omahooli moAngola.
“Uupyakadhi wu li po wompumbwe yomahooli goJet A-1 owu na sha nongushu yomahooli osho wo oshikumungu shomangeshefelo pokati komahangano gaali gokwaandjaganeka omahooli, nonkene shoka kashina nande ekwatathano nomalongekidho gepangelo gokweeta omahooli gopetrola nodisela moshilongo,” osho minista gwiikwankondo Modestus Amutse a popi ngaaka okupitila momukanda gwiikundaneki a pititha mOmaandaha.
Minista okwa yelitha kutya ehangano lyomahooli lyedhina Puma Energy okwa li lya gandja omahooli [goJet] goondjo kehangano lyedhina Vivo Energy – ongeuvathano lyopangeshefa opo Vivo Energy a futilepo omahooli ngoka notenga yomahooli ndjoka yi iyadha ya kalekwa shi na sha nomakonakono gongushu, oshiwike sha zi ko.
Onkene onkalo ndjoka oyo ye etitha ompumbwe yomahooli goondhila dhoJet moshilongo.
Embestelo lyotenga yomahooli taga pingenepo ngoka ga kalekwa, okwa tegelelwa yi thike moshilongo mOlyomakaya.
Minista okwa popi kutya onkalo oye eta shili uupyakadhi wompumbwe yomahooli goondhila moshilongo, ashike okwa dhenge omuthindo kutya onkalo ndjoka kayina nande olunyala motendela yaVitol yokweeta omahooli moshilongo.
“Euvathano lyepangelo lyokweeta omahooli moshilongo okupitila kuVitol olya ningwa ongonkambadhala yopakathimbo opo omahooli gopetrola nodisela ga kale tage ya moshilongo osho wo kondando yi li nawa.
Onkene, shoka oshinasha owala nomahooli gopetrol nodisela [inashi kwatelamo omahooli goondhila],” osho Amutse a gwedhapo ngaaka.
Minista okwa popi kutya omahooli goondhila dhoJet A-1 kage li nande oshitopolwa sheuvathano lyepangelo kombinga yomahooli taga etwa moshilongo kuVitol nonkene ompumbwe yomahooli ngoka oya holoka owala omolwoshikumungu sheuvathano lyopangeshefa osho wo ongushu yomahooli ngoka ngaashi sha tumbulwa metetekelo.
Amutse okwa popi kutya monakuyiwa ota ka shilipaleka kutya omilandu nomalongekidho oga tulwa po okukwashilipaleka kutya omahooli goondhila dhoJet A-1 oga silwa oshimpwiyu.
“Uuministili owuna oshinakugwanithwa okushilipaleka kutya oshikondo shoondhila moshilongo oshina omahooli ga gwana okwiidhidhimikila oonkalo kehe,” osho a popi ngaaka.
Minista okwa popi kutya omakonakono kombinga yongushu yi li pevi yomahooli ngoka ga kwatwa po onkene taga tsikile nooministili otawu kapewa owala uuthemba kombinga yoshiningwanima shoka uuna omakonakono ga manithwa.
Oshilyo shongundu yoIndependent Patriots for Change, Nelson Kalangula, okwa popi kutya onkalo ndjoka ya holoka yompumbwe yomahooli goondhila oya holola uunkundi tawu adhika moshikondo shomahooli goondhila moshilongo.
“Oshizemo shompumbwe yomahooli oshe eta onkalo itaayi vulu okutaambiwa ko ndjoka tayi vulu okweeta uuwinayi keliko osho wo komapendulopo goshilongo,” osho Kalangula a popi ngaaka.
Edhina lyoshikondo shoondhila moshilongo otali vulu woo okunyata omolwonkalo ngandjoka, osho a gwedhapo ngaaka.
Kalangula okwiindile ehanganokondololi lyoondhila moshilongo lyedhina Namibia Civil Aviation Authority li ninge omayalulo kombinga yondondo yomahooli osho wo okweeta po ondungethaneko yomapungulo gomahooli.
