Oshikondo shehongo, kErongo osha tamukulula omatambulifo ondodo yopetameko nondodo yotete, sha landula eshi kwa li a kalekwa manga petameko lomwedi ou.
Omunambelewa akula wewilikongudu loshitopolwahoololo shErongo Sem Ntelamo koshoongalele shoikundaneki Etivali okwa ti omatambulifo okwa li a kalekwa opo kuyandjwe omhito kelelo lehongo li tale eefikola odo di li po.
Opo li dule okutota po omulandu wopauyuki wokutambula ounona shaashi kapu na eenhele da wana.
Okwa ti etalululo okwa li la tala komwaalu weengulu dofikola odo di li po, eefikola odo tadi tungwa eshi hatu popi ngaha nomwaalu wounona ovo va pumbwa eenhele opo kukwashilipalekwe kutya eenhele odo di li po oda tukulwa nawa.
“Ekaleko ole tu pitika tu ete po omulandu wopauyuki tau vatele keshe okaana.
Kakwa li ashike okuwedela eengulu dofikola, nande eefikola dimwe otadi longwa.
“Okwa li yo twa tala nghee tu na okulongifa eenhele odo di li po, mwa kwatelwa okutota po eetundi domutenya, opo keshe okaana ka mone omhito yokumona onhele,” Ntelamo ta ti.
Omukulunhuwiliki wehongo ta vatele kErongo Helen Asino okwa ti omaindilo eefikola moSwakopmund nOmbaye aa tameke Etivali.
Okwa ti omaindilo ondodo yopetameko ounona ashike ovo va dalwa momudo 2021, omanga ondodo yotete ounona va dalwa momudo 2020.
Omatambulifo otaa tameke momafiku 21 fiyo 27 Juli.
Eefooloma domaindilo otadi hangika koSwakopmund Teacher’s Resource Centre, kombelewa yoshikandjohongo mOmbaye, eembelewa doikandjohoololo noitaashi yopolifi.
Otadi hangika yo vali kepandja lokomalungula lewilikongudu loshitopolwahoololo shErongo.
Eefoloma nadi twalwe koSwakopmund Teachers Resource Centre ile kombelewa yoshikandjohongo mOmbaye manga omafiku inaa koya.
Asino okwa yeleka kutya omatalululo omaindilo otaa ka ningwa okudja momafiku 04 fiyo 07 Auguste, omanga ovadali novatekuli vounona tava ka shiivifilwa opo pa tambulwa ounona vavo momafiku 20 Auguste.
Okwa yeleka kutya omatambulo itaa ka tala kutya olyelye e ya tete, ashike otaa ka ningwa pauyuki nopauyelele.
Ovadali ovo ounona vavo inava tambulwa keefikola odo va hala natango otava ka talwa kokomitiye yomatambulifo moshitopolwahoololo, ashike ongee nee pu na eenhele. -Nampa
