Ounima vokukonakona omalodu mohonde nokashina kokufudila mo itaka longo oka piyaaneka omakonakono oshiponga shi nyanyalifa kOndangwa, osho sha twaalela omwenyo umwe nokulemaneka ovanhu vahamano.
Eshi oshe likolelela kolopota yoshiningwanima yopolifi ya dja kukomufala wopolifi mOshana Etitatu Andreas Shilelo.
Oshiponga osha ningwa Etivali omutenya eshi okabesha vati ke lidenga mokatuwa kashona ndee taka pweda ka yuka movalandifi novaendi vokolupadi ovo va li komunghulo wondjila.
Ananias Mvula (44), omukalimo womOkatale mUukwiyu Uushona okwa xulifila poshiningwanima.
Ovakainhu vahamano ova lemana nokwa li va twalwa koshipangelo va ka mone omayakulo opaunamiti.
Cecilia Kandenge vati okwa mona oshiponga komutwe, omanga Rosalia Simon, Elizabeth Namtanga, Linda Nteka, Johanna Mumbandje naHanna Amwele va ninga oipulumuna i li xwepo.
Opolifi oya patulula oshipofa shedipayo lihe fi loshiningilewina nokushinga omushingi e li koshi yondungo.
Olopota yopolifi oya ti, omushingi wokabesha okwa monika omalodu mohonde konima a fudilifwa mo.
Ashike nee, ovakonakoni ova taalela omikundu dihapu konima ounima vokukonakona omalodu mohonde poitaashi yopolifi mOshana nomOshikoto va monika kutya ova kwisha.
“Eshina lokukonakona omalodu moshitopolwahoololo nalo okwa lopotwa kutya itali longo,” olopota tai ti.
Opolifi Etitatu okwa li ya teelelwa i ninge etokolo ngee otai twikile nokwiidilila omushingi ile nai mu efe manga omakonakona taa twikile.
