Olusheno mOvenduka ola wedelwa onghela ngaashi Elelo lOshilando la shiivifa Etivali kutya otali i pombada neepelesenda 3.6 momudo woshimaliwa 2026/27.
Eshi osha hala kutya, moshimaliwa shi fike poN$100, ovayakulwa otava ka mona ashike olusheno li fike po37.6.
Auguste a dja ko oshilando okwa li sha wedela olusheno neepelesenda di li 4 domudo woshimaliwa 2025/2026, osho sha tameka mulotete laAuguste.
Ewedelo, olo la ya moilonga mulotete laSeptemba, okwa li la diminwa konguduwiliki yolusheno yedina Electricity Control Board (ECB) ngaashi okatendo kolusheno komudo 2007 taka ti.
Omupopiliko wOshilando Lydia Amutenya okwa ti ewedelo ola pumbiwa kukwashilipalekwe eyandjo lolusheno tali twikile, li shii okulineekelwa nolusheno li na ongushu moshilando ashishe.
Okwa ti ewedelo otali ka pitika yo oshilando shi xwepopeke nokukwatela po omatungo olusheno, tashi wanifa po omumbwe yolusheno oyo tai i pombada nokukwashilipaleka eyandjo lomayakulo tali kalelele.
“Nande oshilando natango oshe litula mo mokukwashilipaleka kutya olusheno oli na ombilixa, ewedelo omafimbo amwe ola pumbiwa mokukaleka po nokuxwepopeka omatungo olusheno, nokukandula po omumbwe yolusheno tai hapupala nosho yo okukwashilipaleka eyandjo lomayakulo laalushe,” Amutenya ta ti.
Oshilando osha ti olusheno natango oli li oshinima sha fimana osho tashi yambidida eyambukepo lopanghalafano nopaliko mOvenduka.
Amutenya okwa ti ewedelo eli otali ka pitika oshilando shi twikile nokuyandja omayakulo olusheno opamufika manga tashi longo shi hange ondjodi yasho yokuninga oshilando shiwa shi na oshisho manga omudo 2027 inau koya.
Ewedelo ole ya moilonga eshi omaumbo neengeshefa tadi twikile okutaalela onghalo i na ondilo neenghono.
