Okomisi yomahoololo yaNamibia oye likanyuna omapopyo oo taa ti inai futa nawa ovanambelewa vomahoololo ovo va longele momahoololo omalelo oitopolwahoololo needoolopa muNovemba 2025.
Omukulunhu wokomisi yomahoololo Peter Shaama okwa ti okomisi oya ti oya mona omanyenyeto okudja kovanambelewa vomahoololo va yooloka kombinga yeendjambi.
“Okomisi otai ti kutya eefuto adishe okwa li da futwa nawa, she likolelela koilonga oyo ya longwa komunhu ngaashi sha didilikwa membo lokuholoka koilonga,” Shaama osho a ti ngaho momukanda Etine.
Ovanambelewa vomahoololo ve dulife po 18 000 okwa li va pewa oilonga momahoololo, neekondalaka da tameka momafiku 23 Novemba fiyo 29 Novemba 2025.
Ashike nee, Shaama okwa yeleka kutya ovanambelewa kakwa li ngeno ashike ve na okufutwa omafiku aeshe oo e li meekondalaka davo ashike okwa li tava futwa she likolelela komafiku oo va longa.
Okwa weda po kutya okomisi yomahoololo oya longifa embo olo hali didilikwa ngee omunhu e ya koilonga i koleke oilonga oyo ya longwa noimaliwa aishe okwa li ya futwa muDesemba.
“Ngee opu na omunhu e na oumbangi wa kolekwa kombinga yoshikumungu eshi, nave u twale koshikondo shi na sha noiniwe yovanailonga okupitila meembelewa dokomisi yomahoololo dopaitopolwahoololo opo va ka pewe omayakulo a wedwa po,” Shaama osho a ti ngaho.
“Okomisi oye litula mo mekalelepo loinima nomelongo lopauyelele.”
