Omukainhu (50) okwa li vati a tuwa fiyo ta xulifa kukaume kaye kopaihole mukulu, oo naye e likufa omwenyo konima yefimbo, peevili dokeengula Oshoondaxa moBlock E moRehoboth.
Oshiningwanima eshi okwa li sha kolekwa komupedu komisina Kauna Shikwambi molopota yoimbuluma yoplifi Oshoondaxa.
Shikwambi okwa ti, oshiningwanima osha ningwa lwopotundi 04h00 eshi omufeekelwa, omunamido 42 Christiaan Kooitjie vati a hanga nakufya, Sofia Nero keumbo lomulumenhu umwe.
Otaku tiwa kutya Kootjie okwa pula omuvelo u yeululwe, ashike eshi omulumenhu oo e li meni e shi anya, okwa longifa oshitenda ndee ta fininike omuvelo u yeuluke.
“Omufeekelwa okwa longifa oshitenda shokuufena sha ningwa meumbo a kondjife omuvelo u patuluke.
Otaku tiwa eshi omulumenhu a mona kutya omuvelo owa yeululwa keenghono okwa nukila komuvelo, ta mono omufeekelwa e na ombele ya patuluka peke, te mu udula a dje mondjila ndee ta faduka po.
Eshi a ka aluka nopolifi nakufya okwa li a hangika a tuwa lutatu kolumosho yofingo yaye,” Shikwambi osho a ti ngaho.
Opolifi oya ti Kooitjie okwa faduka po nde ta hangika a endjelela mondunda yaye.
Ovakwapata vanakufya ova shiivifilwa nomakonakono otaa twikile.
Moshiningwanima shimwe sha yooloka omukainhu (53 ) vati okwe likufa omwenyo eshi e limangeleka meumbo laye mOshetu 1 kOkahandja moshitopolwahoololo shaTjozondjupa Oshoondaxa.
Omukulunhu woipambele yomoshiwana wopolifi moshitopolwahoololo, omukulunhu inspkta Maureen Mbeha momukanda Omaandaxa okwa ti nakufya okwa li a dimbulukiwa kutya oye Julianne Indongo.
Olutu laIndongo okwa li la monika komukwapata oo kwa li e ke mu tala konima eshi ina dja mo nande meumbo laye Oshoondaxa, Mbeha osho a ti ngaho.
“Olutu laye okwa li la monika lwopotundi 09h00, la endjelela moshitenda meni leumbo laye nongodi natango i li mofingo yaye,” Mbeha osho a ti ngaho.
Ovakwapata vaye nopolifi okwa li ya shiivifilwa.
Indongo ina fiya po nande okambapila ke na ouyelele waasho sha etifa elikufomwenyo noka pu nande oshinima sha puka tashi feekelwa fiyo opapa.
Omakonakono opolifi otaa twikile opo kumonike kutya osheetifi noikumungu yefyo laye oya shike, Mbeha osho a ti ngaho.
Moshingwanima shimwe vali sha yooloka opolifi otai kongo omuwapaleki oo a faduka po nohauto yovanhu okudja poIslamic Centre mOvenduka konima kwa li a pulwa e i koshe Etitano.
Omupopiliko wopolifi wopashiwana komisina Kauna Shikwambi molopota yoimbuluma yopolifi Oshoondaxa okwa ti oshingwanima okwa li ashike sha lopotwa potundi 17h00 efiku olo tuu olo.
“Otaku tiwa vati omuwapaleki wokonhele oyo ya tumbulwa pombada oo kwa li e na okuwapaleka ohauto okwa faduka po nayo,” osho a ti ngaho.
Moshiningwanima shikwao she lifa kOshikango moshitopolwahoololo shaHangwena Olomakaya, otaku tiwa vati ovafeekelwa vavali ova udula ohauto yovanhu opo kwa li ya palakiyela ndee tava faduka po nayo va yuka keengaba daNamibia naAngola.
Osheendifo eshi oshi na ongushu yoshimaliwa shi fike poN$40 000.
“Kapu na nande ohauto ya monika ile omunhu a mangwa po natango. Omakonakono opolifi otaa twikile,” Shikwambi osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
