Oministeli yOmayambulepo Eedoolopa nOitopolwa yOkomikunda oya didilika kutya oiningwanima yelongifo loimaliwa inai pitikwa momalelo eedoolopa noitopolwahoololo otai ningi ihapu.
Eshi oshe ya konima minista James Sankwasa a londwela kutya ewiliko la nghundipala loimaliwa otali kateke eyandjo lomayakulo nokuteya po elineekelo loshiwana.
Eshi kwa li ta popi koshoongaleleilonga shewiliko loimaliwa Omaandaxa koSwakopmund, Sankwasa okwa ti omawiliko amwe itaa landula omilandu domitengenekwafaneko, taa longifa oimaliwa meepoloyeka inadi diminwa.
Okwa ti kutya oshinima eshi osha eta elongifonai loimaliwa yoshiwana , tashi tula oimaliwa yeyandjo lomayakulo moinima inai pitikwa nokweendifa kashona eyokomesho loitopolwahoololo needoolopa.
Oministeli oya dimbulukifa eekamusela novanambelewa kutya Okatendo kOmalelo Oitopolwahoololo nEedoolopa oka yeleka nawa oinakuwanifa yovaleli va hoololwa novanawino manga yo taka popi kombinga yewiliko loshimaliwa nawa.
“Ewiliko loshimaliwa ola fimana mokukwashilipaleka kutya oimaliwa yoshiwana oya longifwa nawa notai wanifa po eyokomesho mewiliko,” osho a ti ngaho.
Oshoongaleleilonga otashi lalakanene okunghonopeka oushili wokulonga noshimaliwa, ekalelepo loinima newiliko momalelo oitopolwahoololo needoolopa manga taku xwepopekwa eyandjo lomayakulo nokwaalula elineekelo loshiwana.
Okwa ti omalelo naa konakone nawa oinima inai yela melongifo loshimaliwa nokunghonopeka omilandu dokulandula ovo tava ka tauluka oveta monakwiiwa.
Okwa pula ovanapolitika novaleli meembelewa va yandje oihopaenenwa iwa, tava nghonopeke omawiliko omeni nokuungaunga noulingilingi okupitila mewiliko liwa.
Sankwasa natango okwa yandja oushima kelongifo lovapokati ngee tashi ya keongelo leengunga molalelo amwe eedoolopa, ta ti oshinima osho osha udifa nai oshiwana.
Ponhele yaasho, omalelo eedoolopa okwa li a pulwa a longife omilandu domeni, a dule okwoongela eengunga damuni manga yo taa kaleke po eenghundafana domeyukililo novakalimo.
Okwa pula ovakufimbinga opo va ka longife osho ve lihonga moshoongaleleilonga keenhele davo doilonga, ta ti kutya elongo lopauyelele nekalelepo loinima nali uye alushe tete mewiliko lomaliko epangelo.
