Okuteta po omifyaati shihe li paveta molwoikuni otaku limbililike moshiotopolwahoololo shaShana nOmusati, novanambelewa otava londwele kombinga yokunyanauna oushitwe inashi pumbiwa.
“Oupyakadi ou otau limonikila unene moshikandjohoololo shUuvudhiya, nomeenhele ngaashi Onkani, Efo-etalala noitopolwa yopondingandinga moshikandjohoololo shOtamanzi moshitopolwahoololo shaMusati,” Akwilinus Hinananye omunambelewa wOministeli yOmidingonoko nOmatalepo koEngombe moshikandjohoololo shUuvudhiya, osho a lombwela oThe Namibian ngaho.
“Omukalo oo tau longifwa kovanhu vamwe okuteta po omifyaati otau limbililike kombinga yekalekepo newiliko loushitwe,” Hinananye ta ti.
Okwa ti oshinima osho tashi kumwifa unene osho sho shokufa mo filufilu omiti, mwa kwatelwa nomidi dado.
Hinananye okwa ti kakele kokuteta ko oitai oyo ya kukuta, okukufa mo omiti di na omwenyo filufilu ohaku dipaya omuti.
Oshinima eshi ngee osha kala nokweendululwa omido dihapu, otashi dulu okudipaya po oixwa filufilu ndee itai tutuma vali, osho a ti ngaho.
Hinananye okwa ti okuka po omiti shihe li paveta meenhele dimwe kaku na sha ashike noikuni momaumbo. Okwa ti ovanhu ve li noimuna keehambo navo ohava tete po omiti opo va ninge oikuni yokulandifa.
“Ovalandi vahapu ohava di keenhele oko ku na oikuni ya pumba, osho tashi eta ovanhu va twikile nokuteta po omiti unene.
Oshinima eshi otashi eta elongifonai lomiti.
Okwa didilikwa yo kutya okututa oikuni ei ya tetwa shihe li paveta otaku ningwa unene momaxuliloshivike nomaufiku, ngee ovanambelewa veameno lomifitu vehe li moilonga,” Hinananye ta ti.
Eshi okwa ti, ohashi ningi oilonga yokukwata ovanhu ava idjuu nokupitika oikuni i kufwe konhele oko ya tetwa okutwalwa konhele imwe noupu.
Hinananye okwa ti oixwa yomifyaati oi na oshilonga shihapu kashi shii ashike oikuni.
Oda fimana momudingonoko nohadi yambidida omaxupilo komikunda, osho a weda po ngaho.
“Omaluxwa ohaa di ngaashi omaungu, oikulya yoimuna noifitukuti noha mu xupile oudila, oipuka noinima ikwao yomoixwa, ohamu di oikulya yovanhu noinima ikwao yoshiwana,” Hinananye ta ti.
Okwa ti okuungaunga nokuteta po omifyaati shihe li paveta inaku kala ashike oshinakuwanifa shoshikondo shokwaamena omakuti osho ashike.
Oshiwana osho shi li momakuti nomomidingonoko domakuti oshi na oshinakuwanifa sha fimana shokwaamena eedjo doushitwe, osho a weda po ngaho.
