Oihokolola yobooloha yaDennis Noa oya undulilwa komafiku 08 fiyo 11 Septemba 2026 konima ovakalelipo vaye vopaveta va pula va pewe efimbo la wana va kundafane nomuyakulwa wavo.
Noa, oo a taalela vati oshipofa shokuningila omulumenhu mukwao omahepeko opamilele, okwa li a holoka mOmhangu yaMangestrata mOndangwa onghela.
Omukalelipo waye wopaveta, Bianca Boois, okwa lombwela omhangu kutya itava dulu okutwikila shaashi i na mona omhito yokukundafana nomuyakulwa waye.
Boois natango okwa indila opo ouyelele womhangu kombinga yaapo pa indililwa Noa u pukululwe.
“Omhangu otai ti okwa idililwa mOndangwa, ashike okudja ngaa eshi kwa li a holoka momhangu tete, Noa okwa kala a idililwa kOmuthiya, osho tashi piyaaneke ekwatafano letu.
Onghee nee, ouyelele womhangu nau ulike kutya okwa idililwa kOmuthiya,” osho a ti ngaho.
Omutamaneki wepangelo Aina Mwaala okwa lombwela omhangu kutya omakonakono opolifi natango otaa twikile.
Okwa ti eembangi dimwe natango inadi yandja omahokololo ado.
Mangestrata Nelao Ya France okwa undulila oshikumungu eshi komafiku 08 fiyo 11 Septemba, opo oihokolola yobooloha yaNoa i ka undike.
