Okwa teelelika odula ya kula oshilongo ashishe momafiku twa taalela, she likolelela ketengeneko longhalo yomhepo.
Olopota yetengeneko longhalo yomheto otai londwele oshiwana shi lilongekide ndee tashi kufa omilandu domondjila shi amene oikunomwa, oimuna, oinamwenyo yomomaumbo noinima aishe tai dulu okunyanaunwa kodula opo iha nyanauke.
“Inamu dimbwa eembwa deni noumbishi. Ngee ito dulu oku va tula meni, kendabala u va ningile onhele yoku va amena koutalala,” olopota tai ti.
Oya londwela kutya kapu na nande etengeneko longhalo yomhepo kondadalunde, shaashi otai lunduluka tai eendelele.
“Netengeneko laxuuninwa kombinga yodula, okwa li kwatengenekwa kutya moshilongo itamu ka monika nande omata odula okudja momafiku 10 Apilili fiyo omafiku 12.
Oshinima eshi osha lunduluka meendelelo, ndee paife odula ihapu oya teelelika koitopolwa ihapu moshilongo moule womafiku aheyali a shikula ko,” osho a ti ngaho.
Natango omutengeneki wonghalo yomhepo Vilho Ndeunyema, okwa ti moshitopolwahoololo sha||Kharas, unene ngaa moKeetmanshoop noAroab otamu ka monika odula i li pokati, ashike inai fa oyo i li poushiindalongo poSouth Africa.
Otaku ka kala outala efimbo longula, unene ngaa moitopolwa yopokati nokoumbuwanhu woshilongo.
“Onooli otai ka kala ya ndjena kashona,” osho a ti ngaho.
