Nujoma a geya molwofaalama

OMUKULUNTUWILIKI gwoshikondo shetopolululo lyevi moNamibia, Utoni Nujoma, okwa lombwele oshikundaneki shoThe Namibian ‘shi ye moheli’ konima sho sha ka kongele uuyelele kuye kombinga yofaalama yedhina Okongava momudhingoloko gwaArandis.

Otaku hokolola kutya omutumba gwopashigwana, moshiwike sha zi ko, ogwa kundathana nkene Nujoma u ungaunga noshikumungu shofaalama yokoshitopolwa Erongo, konima sho oshilyo sho-PDM Vipuakuje Muharukua sha nyenyeta kutya Nujoma okwe yi gandja po komuntu gwaandjaMushimba.

Konima sho oonkandathana dha lulu, Nujoma okwa zi mo mopaliamente.

Nujoma naye oludhi lwaMushimba, omutekulu.

Oshiwike sha zi ko, Muharukuwa popile ta ti petameko, ofaalama ndjoka oya pelwe aakwashigwana yomomudhingoloko gu li uushiinda nayo kominista onkulu yomatulululo, Alpheus !Naruseb, opo ya tanunune mo omukunda gwawo.

Nando ongaaka, Muharukua ta ti, sho Nujoma a dhimbulula kutya mofaalama omu na iikwamamanya yongushu, okwa lundulula etokolo lya!Naruseb, ta ti oyepangelo, nokonima okwe yi gandja komukwanezimo lye gwoludhi lwaMushimba.

Muharukua okwa ti kofaalama hoka Nujoma okwa ya ko iikando oyindji.

Sho a pulwa a gandje uuyelele uunambo, petameko Nujoma okwa lombwele onzonkundana ndjika yi ‘ye koheli’, ihe okwa ka dhenga lwanima a gandje ehokololo lye nokwa gunu omutoolinkundana a gandje ehokololo lyomondjila.

Okwi ikala okutula omuntu mofaalama, ta ti [ofaalama] natango oyepangelo.

Pahokololo lye, aakwashigwana mboka ye li puushiinda wofaalama inaa pewa epitikilo ye yi lale, ihe oye yi ikuthile konima sho epangelo lye yi landa kumboka ya li nale ooyene yayo.

Nujoma okwa gwedha po kutya ndhoka ta popilwa kuMuharukua odhanakalindi nodha totwa nelalakano lyokupukitha oshigwana.

“Natango ofaalama oyepangelo. Otatu tala kutya uupyakadhi [wokofaalama hoka] otatu wu potokonona ngiini.

Uupyakadhi owu li mpaka kutya, konima ashike sho ofaalama ya landwa ko, yo aakwashigwana otaa iteyele mo notwe ya pula ya ze mo opo tu yi gandje kumboka taa yi sindana po okupitila momaindilo,” Nujoma ta ti.

“Opu na omulandu gwokutululula aantu. Itashi wapa omuntu gumwe ta zi hoka e ta tululula mukwawo mehala. Kapu na siku sha ningilwe, ohatu landula oveta. Aantu oyi ilonga okukala taa ti minista okwa gandja evi. Kashi li mondjila,” Nujoma ta yelitha.

Nujoma okwa pula wo Muharukua a gandje uumbangi mboka tawu holola kutya okwa gandja ofaalama komukwawo, ye a ye wo kokomisi yokukondjitha iilonga yedhengelo lyondhi peho e ta ka patulula oshipotha kopolisi.

“Ota vulu okuya kukehe oshiyukithilo, kutya nee okomukonaakonindjayi, kopolisi nenge okokomisi yokukondjitha iilonga yevundakano, opo omahokololo ngaka ga konakonwe. Omilandu oku dhi shi,” minista ta ti.

“Ohatu lombwelwa ashike kutya otwa vundakana, yo ihaa ipula kutya uuthemba wetu ongaanapolitika okwa gamenwa kekotampango. Omolwashike aantu ihaa wu toolithwa mo?” Nujoma ta pula.

Nando a ti ngaaka, Nujoma ina koleka ngele mofaalama omu na iikwamamanya.

Kakele kaashoka, Muharukua okwa ti oku na omushangwa ngoka gwa nyolelwa aakalimo yomomudhingoloko moka ku!Naruseb, e ya pa epitikilo ya tamunune mo omukunda gwawo sigo omofaalama.

Okwa gwedha po kutya aakwashigwana yomomudhingoloko moka oya patululila uuministeli oshipotha.

“Uulela owu li mpaka kutya ondi na ontumwafo ndjoka ominista onkulu ya nyolela elelo lyopamuthigululwakalo, ye li pa uuthemba wokutamununa mo ehala lyalyo li kwatele mo ofaalama,” Muharukua ta yelitha.

“Ihe sho minista nguka e ya, okwa tokola kutya mehala omu na omina tayi vulu okuza oshimaliwa onkene itali vulu okupewa aantu mbaka, nokwa tokola e ya tidhe mo. Sho tatu popi ngeyi otaa mina mehala moka. Otandi popi ashike ndhoka nda popile mopaliamente,” Muharukua ta ti. Ngoka a li nale ominista yomatulululo, !Naruseb, ina yamukula omapulo ngoka ga tuminwa kongodhi ye yopeke.Ngashingeyi !Naruseb oye omukuluntuwiliki gwoshikondo shuunamapya nuuniimuna.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.