Omunandjungu Michael Amushelelo okwa popi kutya ita mangwa komulungu nande nota tsikile okukondjela shoka e wete shi li mondjila nomuuyuuki.
Ndhoka Amushelelo okwe dhi popi okupitila komalungula koFacebook konima owala sho a monika ondjo yokuya pambambo omalombwelo goveta ngoka kwa li a pewa kompangu shinasha noshipotha shoka kwa li a tulilwa mo kondjayi yetanga lyopolisi ngoka a kuthwa miilonga pakathimbo, Joseph Shikongo.
Amushelelo mEtitano okwa londodhwa kompangu nokupewa egeelo lyondholongo yuule womwedhi gumwe – ndyoka itaali tulwa miilonga ngele okwiiyutha komalombwelo ngoka a pewa.
Shoka osha ningwa okupitila metokolo ndyoka lya ningwa sho a monika ondjo yokudhina omalombwelo gompangu ngoka a li a pewa i iyuthe kugo meuvathano lyopaveta ndyoka kwa li a ningi naShikongo mompangu opo ya fumvike oshipotha shenyateko lyedhina shoka kwa li a tulilwa mo kuShikongo.
“Nonande ndi kale tandi falwa kompangu, tandi kondjithwa mompangu nokutaalela iilanduli itandi hulithapo okukalelapo Aanamibia,” osho Amushelelo a popi ngaaka konima yetokolo lya ningwa mompangu, oshiwike sha zi ko.
Okwa popi kutya ota tsikile nokupopya kehe shoka e wete kaashili nawa kutya nee otashi ningwa kwaamboka yena oonkatu dhopombanda moshilongo ye wete kutya kapuna ngoka te ya gumu.
Melombwelo ndyoka lya gandjwa mOmpangu yoPombanda, mEtitano, omupanguli Nate Ndauendapo okwa gandja etokolo kutya Amushelelo okwa li a dhini oveta nokutaaguluka elombwelo lyompangu lyaashoka e na okwiiyutha kulyo meuvathanotsokumwe kwa li lya ningwa pokati ke naShikongo opo oshipotha shawo shi ekelelwehi.
Omalombwelo ngoka taga popiwa gaashoka e na okwiiyutha kugo, Amushelelo okwa li e ga pewa mo2024 mOmpangu yoPombanda.
Nonkene Ndauendapo oshiwike sha zi ko okwa gandja egeelo kuAmushelelo a ye mongali uule womwedhi gumwe, ashike egeelo ndyoka itali tulwa miilonga ngele okwiiyutha komalombwelo natango a pewa i iyute kugo muule woomwedhi 12 twa twa taalela.
Omalombwelo gopaveta ngoka a pewa opo kaaye mokalimosho paife otaga ti: Inaya we nande pambambo omalombwelo ngoka a pewa komupanguli Ndauendapo, iikaleke kokule “nokutula komalungula nenge okwaandjaganeka iinima kehe mbyoka tayi nyatekitha edhina”lyaShikongo, ishewe “gandja ombili pambelewa tashi ningwa pambapila” naashoka nashi kale sha ningwa muule womasiku inaaga konda pugaheyali.
Elombwelo ndyoka lya gandjwa kuNdauendapo olya zi moshipotha shoka Shikongo kwa li a tulile mo Amushelelo shi na sha noshipopiwa shoka Amushelelo kwa li a tula komalungula goFacebook muMaalitsa omumvo gwa zi ko.
Shikongo okwa shuna kompangu omumvo ga zi ko ta popi kutya Amushelelo okwa yi pambambo elombwelo lyompangu ndyoka kwa li a pewa muKotoba 2024.
Eshi ningi nonande mompangu okwa li Amushelelo naShikongo ya tsu kumwe opo oshipotha moka Shikongo kwa li ta futitha Amushelelo omiliyona N$1 omolwenyateko lyedhina, shi ekelwehi.
Ofuto ndjoka Shikongo kwa li ta pula oyi nasha naandhoka okwa li dha popiwa kuAmushelelo mekwatathano noshiponga shoshihauto moka Shikongo kwa li i idhenge mumwe noshihauto shilwe monooli yoshilongo muDesemba 2022 nokwa li mwa kanene oomwenyo dhaantu yatatu.
Meuvathanotsokumwe ndyoka kwa li lya gandjwa kompangu muKotoba 2024, Amushelelo okwa li a pulwa a gandje ombili kuShikongo osho wo okukala a zimina pambelewa kutya oti ikala we nokuninga omapopyo ga gwedhwapo ge nasha noshiningwanima shoka shoshiponga shaShikongo.
Ashike nando ongaaka, MuMaalitsa omumvo gwa zi ko, Amushelelo okwa pogola omalombwelo ngoka okupitila koFacebook sho a tsikile nehokololo kutya Shikongo natango ina hokololithwa paveta kombinga yoshiponga she shoka faalele oomwenyo dhaantu, nokwa li wo a pula opo a tulwe miipandeko.
Shikongo okwa shuna kompangu ta popi kutya Amushelelo okwe mu popi tati “okwa ninga edhipago lyaashi lyoshiningilawina” nokwa gwedhapo natango tati “otandi thengwa molwashoka itandi hokololithwa [koveta] kwaashoka nda ningi”.
Shikongo okwa popi kutya Amushelelo ndhoka okwe dhi popi nonande okwa li a tseyithilwa kutya epeko lyoshipotha [shaShikongo] olya falwa kOmbelewa yOmutamenekindjayi opo ku ningwe etokolo ndyoka tali yeleke paveta ngele okuna okutulwa miipandeko nenge hasho mekwatathano noshiponga shoka shoshihauto.
