Nandi-Ndaitwah okwa udaneka okwaamena emanguluko loikundaneki

Presidente Netumbo Nandi-Ndaitwah okwa pandula oikundaneki moshilongo eshi tai twikile nokukufa ombinga meyambukepo lopashiwana, ta ti epangelo otali twikile nokupopila emanguluko loikundaneki.

Presidente, momukanda wokoikundaneki wa pitifwa mokudimbuluka efiku loikundaneki lopaunyuni Oshoondaxa, okwa ti okwa li ta waimine ounyuni “mokuudaneka efimano loikundaneki ya manguluka, ye lifikamena noi na oshinakuwanifa”.

Efiku eli ohali dimbulukiwa alushe momafiku 03 Mei komudo.

Oshilongo okwa li shi li pondodo yoikundaneki ya mangulula o-23 mafiku aa moilongo i li o-180. Oshilongo oshe linyenga okudja pondodo o-28 opo sha li momudo 2025.

Nandi-Ndaitwah okwa ti oshilongo otashi twikile nokukalela po oikundaneki menenedu Africa nopaunyuni. Shi li alushe mokati koilongo oyo i li pombada memanguluko loikundaneki.

“Nena, otu li pondodo o-23 mounyuni nopoutivali menenedu Africa.

Oshinima eshi kashi shii ashike oilonga yoikundaneki, ashike oukwatya wetu wopashiwana nelitulemo letu tali twikile leenghedi dopaudemokoli, elongo lopauyelele nomhango yoveta,” osho a ti ngaho.

Ashike nande ongaho, Nandi-Ndaitwah okwa ti ondodo ei oye ya noshinakuwanifa.

“Otai tu pula atushe, epangelo, oikundaneki noshiwana, tu amene nokunghonopeka ondjokonona ei ye ya noudjuu nokukwashilipaleka kutya oshilongo natango oshi li onhele ya amenwa, ya manguluka noi shii okulineekelwa ngee tashi ya pokupaafana omadilaadilo, osho sha fimana ngee tashi ya komaufemba ovanhu, eyambukepo laalushe nombili yopashiwana,” osho a ti ngaho.

Okwa ti oshilongo otashi dimbuluka efiku eli, pefimbo opo ounyuni u hadi eenamanana.

“Moitopolwa, otu wete eenamanana dopapolitika tadi ningi dihapu, eandjakano lomauyelele ehe li mondjila nomafininiko a wilila po omahangano oikundaneki,” osho a ti ngaho.

Okwa weda po kutya monghalo i li ngaho, oilonga yoikundaneki oya ninga nokuli vali idjuu, kai shii ashike mokukundaneka oshiwana, ashike omokukwatela po yoo oshili, okuxwaxwameka oikundaneki nokukelela elineekelo loshiwana liha teke po.

“Oilongapondoli ei otai holola elitulemo letu atushe lokuyambula po eenghedi odo di li mekotamhango letu, mwa kwatelwa emanguluko lokuyandja omaliudo, okumona omauyelele noufemba woikundaneki i longe puhe na omalidopemo,” osho a ti ngaho.

Presidente okwa ti kutya oikundaneki ya nuka po ohai dana onghandangala ya fimana mokunghonopeka emanguluko, okuxwaxwameka elongo lopauyelele nokupula omahangano a kalele po oinima.

“MoNamibia, oikundaneki oya kufa ombinga ya fimana meenghundafana dopashiwana, eyambukepo noukumwe.

Onda pandula ovatoolinghundana aveshe, ovadindi novanailonga aveshe voikundaneki molwelitulemo lavo, omukumo noushili mokuyandja ouyelele koshiwana.

Natango ohandi pula outoolinghundana wopamufika, u li mondjila nokulopota ku na ouyuki, unene ngaa mounyuni womalungula taa endelele,” osho a ti ngaho.

Okwa ti kutya emanguluko loikundaneki kali shi ashike oshikumungu shoikundaneki, ashike oshinima shopaudemokoli.

“Ola fimana keameno lomaufemba ovanhu, exwaxwameko lomayambulepo nekwatelepo lombili neameno moshiwana shetu,” presidente ta ti.

Nandi-Ndaitwah okwa ti oikundaneki ya manguluka noyopamufika ohai pitike oshiwana shi ninge omatokolo omondjila, ohai nyane oinima ihe na ouyuki nokunghonopeka ekalelepo loinima moikondo aishe.

Mokuninga ngaho, okwa ti, ohai nghonopeke omakwatafano opanghalafano pokati kepangelo novanhu valo, omanga tai kufa ombinga koshiwana shi na ouyuki, ombili noshapama.

“Ohandi udaneke elitulemo lakola moshilongo lokwaamena emanguluko loikundaneki, omanga yoo handi pula oikundaneki i longife emanguluko eli nawa, pamufika nonoshiwana komutima,” osho a ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.