IIYEMO ya Namibia okuza koshiketha shiifendela shuumbugantu wAfrica[SACU] oya tegelelwa yi gwe pevi nooperesenda 52,7 momumvo gwiimaliwa twa taalela.Ndika olyo etengeneko lyominista yopevi yIimaliwa, Calle Schlettwein sho a popi moshigongi shopashigwana.
Okwa ti oshinima shoka tashi eta egwopevi osho iiyemo mbyoka ha yi zi miifendela yomalanditho gopaigwana okuza koSacu, mbika oya tegelelwa yi shune pevi nooperesenda 30, 4 nuumvo noshowo okushuna monima nooperesenda 52,7 momumvo gwiimaliwa 2011-2012, osho Schlettwein a ulike pethimbo a tula omutengenekothaneko gwuuministeli we poshitaafula moparliamende.
Namibia okwa kala ha mono iiyemo yoobiliona hetatu okuza ko Sacu omathimbo ga piti kehe omumvo na okwa li a tegelela iiyemo yoodola oobiliona hamano omumvo gwa yi.
Shika osha eta mpoka kutya Namibia yemwene okwa nkondopeke egongelo lyiifendela oku za moshilongo naashika osha eta mo konyala iiyemo ya gwedhwa po yongushu yoodola obiliona yimwe omumvo kehe okuza momumvo 2006.
Omashongo gamwe ga taalela Namibia kombinga yiiyemo okuza miifendela ya Sacu oongoka ge yuulululo kombinga yiifuta yomalanditho unene okushitalela momalongekidho gomalanditho ga manguluka.
‘Onkene otandi indile aakwashigwana ayehe opo ya gandje elongelokumwe lyawo nokwiishangitha ongo aafuti yiifendela, no ya fute oompale dhawo kepangelo ngaashi sha tegelelwa, na ina ya kala ashike ta ya indile epangelo li ya kwathe ngele oya pumbwa eyulululo kiifendela yawo.’ osho Schlettwein a indile.
Sho omangeshefelo taga manguluka kashona nakashona, nokweeta eshonopalo moompale, epangelo olya thiminikwa okukonga oonzo dhilwe dhiiyemo.
Okwa ti epangelo ota li konakona ompito yokukunguna oonzo dhomudhingoloko, oofuto molwo okulongitha oonzo dhopaushitwe[ hadhi hulupo nenge ndhoka iha dhi hulupo], iifendela komalanditho pondje giitumwa pondje inaa yi hambulwa sha ongo omalunza giiyemo oku pingenapo mbyoka ya shonopala okuza ko Sacu.
Na oku pangela egongelo lyiiyemo okuza pehala limwe odho omikalo tadhi vulu okulongithwa opo iiyemo yi indjipalekwe.
