MINISTA yOmayambulopo gOondolopa nIitopolwa yOkomikunda Peya Mushelenga, okwa li a kunkilile Aandonga opo ya hangane yo ye ekelehi uutondwe mboka wu li pokati kaaleli yAndonga omolwuuwanawa woshigwana.
Mushelenga okwa li a gandja elombwelo ndika pelangeko pambelewa lyomukwaniilwa gwaNdonga Fillemon Shuumbwa Nangolo mOlyomakaya.
Elangeko ndika olya li lya ningilwa mombala ompe, momukunda Onambango moshitopolwa shaShikoto.
Mushelenga okwa li a lombwele engathithi kutya paveta oku na oshinakugwanithwa shokukukala pelangeko omukwaniilwa pambelewa konima sho a li a gandje epitikilo kuNangolo ongOmuwiliki gwopamuthigululwakalo gwelelelo lyaNdonga.
“Onda pewa oshinakugwanithwa shokukala nena mpaka,” Mushelenga ta ti ngaaka.
Minista okwa ti paife iilyo yelelo lyaNdonga oya pumbwa okukandula po omaupyakadhi ngoka ge li pokati kawo opo ya longele kumwe nombili, oshoka etopoko ndyoka li li po itali eta uukumwe.
Okwa li a pula opo omalenga agehe ga yambidhidhe omukwaniilwa omupe moshinakugwanithwa shoka a pewa.
Engathithi enene lyoonakataleko nawa olya li lya gongala kOnambango okuninga ooihoyontali pelangeko lyomukwaniilwa omu-23 gwaNdonga Nangolo.
Nangolo okwa landula Omukwaniilwa Immanuel Elifas ngoka a manene oondjenda momasiku sho ga li 26 gaMaalitsa omvula ndjika.
Elifas okwa li a fumvikwa momasiku 13 gaApilili, ashike esiku lya li lya landula efumviko, ongundu yimwe yezimo lyaawa nomalenga ngoka ga ndhindhilikwa moshifo shepangelo oga ulike, Shuumbwa Nangolo ongomukwaniilwa gwaNdonga a landule nakusa Elifas.
Ashike konima owala yokathimbo esiku olyo tuu ndyoka ongundu onkwa wo yezimo lyaawa yaNdonga oya li ya ulike Konisa Eino Kalenga ongomulanduli nomukwaniilwa omupe gwaNdonga.
Ongundu tayi yambidhidha Kalenga oya li ya kambadhala paveta okuya moshipala elangeko lyaNangolo pambelewa ashike inayi shi pondola.
Ongundu yaalanduli ya Kalenga oya li ya pula opo ompangu yi ekelehi eindilo lyaNangolo ongomukwaniilwa omupe gwaNdonga, ashike Omupanguli Thomas Masuku, mEtitano okwa li e ekelehi eindilo ndyoka lya li lya tulwa mompangu kongundu yaKalenga.
MOlyomakaya Nangolo okwa li a taambwa ko kengathithi enene lyaantu taya ligola nokukaluka pethimbo a li ta zi mombala ompe nomukulukadhi gwe Adelheid osho wo aaleli mwa kwatelwa omupehapresitende Nangolo Mbumba mboka ya li ye mu kundukidha.
Moshipopiwa she shetaambeko, Nangolo okwa li u uvaneke kutya ye omukwaniilwa gwAandonga ayehe, ashike itashi ti ota lele oshilongo shAndonga oye awike, okwa li a pula opo oshigwana shAandonga shi imange uukuni kumwe nokulongela kumwe. Okwa ti ota ka longa kee na nande ondjoolola nAandonga ayehe kee na kutya oya gama ongundu yini.
Okwa ti omaipumomumwe goongundu dhaawa yaNdonga oga ninga iinima yonkulu onale, nokwa li a pula opo aantu ye yi fumvike.
“Otandi ki ihumbatela aantu ayehe shi thike pamwe, noitandi ka tongola mboka ya li taya yambidhidha ongundu ndjiyaka ya li tayi kondjitha ndje,” Nangolo a lombwele engathithi ngaaka.
Nangolo okwa li a zalekwa nokupewa pamuthigululwakalo omandhindhiliko goonkondo dhuuleli komalenga omanene Vilho Kamanya naAnneli Mbumba, mwa kwatelwa ohamala yuunashipundi, okopi yEkotampango lyaNamibia nokopi yooveta dhoshilongo shaNdonga, egonga nosho wo epaya, egala noshipa shongwe.
Iinima yilwe yopamuthigululwakalo oya li ya ningwa kugumwe gwomaakuluntu yaNdonga, Shali Kamati nokuhegona Martha gaNamupala.
Omukwaniilwa omupe okwa li a ganithilwa moshilonga komunashipundi gwelelo lyopamuthiglulwakalo gwUukwanyama, elenga George Nelulu peha lyomukwaniilwa gwUukwanyama, Martha Mwadinhomo Nelumbu.
