Presidente Netumbo Nandi-Ndaitwah okwa ti omalelo opamufyuululwakalo naa longele kumwe noiputudilo neemisiuma opo a kwashilipaleke kutya omifyuululwakalo da yooloka oda tulwa momambo.
Edi Nandi-Ndaitwah okwe di popya pefimbo lOshivilo shOpamufyuululwakalo shokomudo shaMasubia koBukalo Olomakaya.
Oshivilo eshi sha li koshi yoshipalanyole ‘Ekwatelepo lEenghedi detu dOpamufyuululwakalo, Etyapulo lOnakwiiwa yetu’, okwa li sha holoka ovanhu okudja oshilongo ashishe.
She likolelela kuNandi-Ndaitwah, elongelokumwe lomalelo opamifyuululwakalo, noiputudilo, eefikola, ovanawino vondjokonona, eemisiuma nomahangano omapekapeko otali kwashilipaleke kutya omalaka, eenghedi, omifyuululwakalo, ondjokonona yewiliko, ounongo noinima aishe ya pamba omifyuululwakalo oya tulwa momambo nokukwatelwa po.
“Otashi kala oshinima sha fimana osho itashi ka kwatela po ashike omifyuululwakalo detu di hangike kepupi lokomongula ashike otashi ka yandja yo ouyelele uhapu wehongo oo tau nghonopeke eudeko letu kombinga yomifyuululwakalo da yooloka moNamibia nokunghonopeka oukumwe wopashiwana noukwatya okupitila mefimanekafano netambuleko lomifyuululwakalo detu,” osho a ti ngaho.
Nandi-Ndaitwaha okwa popya kutya ovilo yomifyuululwakao oya fimana, shaashi ohai yandje yo ounongo wokukandula po eenamanana kovanyasha.
Okwa indila ovanyasha ve lipake mo momahongo oo hava mono poivilo ei ndee tava pwilikine kovakulunhu nghee ve na okuliumbata monghalamwenyo.
“Momafimbo aa e yadi eenamanana nomakulukuto opapolitika, ovaleli woshiwana shetu vokomongula nava kale tava dulu okulongifa omahongo avo omifyuululwakalo va kwatele po ombili nelandulafano moshiwana,” osho a ti ngaho.
Okwa ti kutya okwa mona eenamanana dihapu di na sha nomalelo opamifyuululwakalo tadi twalwa keemhangu doshiwana ponhele ashike kulongifwe oveta yopamifyuululwakalo.
“Natu dimbuluke kutya okuefa eenamanana di na sha naau ta i koshipundi ku tokolwe keemhangu otaku haula eenghedi detu dopamufyuululwakalo, ngee itaku di duda mo filufilu moshiwana,” osho a ti ngaho.
Presidente okwa tambula ko enangeko laHompa Bartholomeus Aruita Kayoka, ohamba yelelo lopamufyuululwakalo loVaGcriku moshitopolwahooololo shaKavango West.
