Ovanawino ova ti oshoongalele osho pelesidente Nangolo Mbumba nahamushangandjai woSwapo Sophia Shaningwa va ninga osha ulika kutya ovo vavali otava tameke okungwangwana.
Shaningwa naMbumba okwa li va shakena nokomisi yomahoololo yaNamibia keumbo lepangelo Etivali.
Omunawino moikwapolitika Rui Tyitende Etitatu okwa pula kutya Shaningwa okwa li a ka tala shike koshoongalele oko, okwa ti eholoko laye koshoongalele ola ulika kutya ongudu oi na omalimbililo kombinga yomahoololo oneudo.
“Oindjemo oyo kwa li ihe li nawa yomudo 2019 no2020 oya pendula ongudu oyo ya kala nokudana onghandangala oule weedula 34,” Osho a ti ngaho.
“Omaliudo ange oyaa kutya elelo loSwapo ola pula Mbumba opo a ifane elelo lokomisi yomahoololo shaashi ova tila okuya pedu kwokulishangifa kwovahoololi meenhele odo ve lineekela, unene ngaa moshitopolwa shaKavango omo ve lineekela,” Tyitende osho a ti ngaho.
Paife ngaha, oshitopolwahoololo shaKhomas, omo Swapo kwa li a kanifa omahoololo axuuninwa, oshi na omwaalu uhapu wovanhu ovo ve lishangifa omahoololo.
Tyitende okwa pula kutya omolwashike oohamushangandjai veengudu dikwao vaha li ko.
Okwa ti oshinima eshi sha ningwa kuMbumba opo a ifane Shaningwa koshoongalele opo va kundafane kombinga yoikumungu yomahoololo osha nyika pange apa noshi li ominge nomhepo yokulela nawa.
Omupopiliko wapelesidente Alfredo Hengari okwa popila eholoko laShaningwa koshoongalele osho sha li ko Etivali nokoyoongi yoKabinete.
“Epangelo laNamibia oli na oinima oyo hai ningwa omo hamushangandjai wongudu tai pangele ha shivwa koyoongalele yoKabinete,” Osho a ti ngaho.
“Pelesidente Mbumba okwa popya oinima ya fimana kombinga yokulishangifa omahoololo oko kwa pamba oshiwana ashishe,” Osho a ti ngaho.
Okwa ti pelesidente ina teya nande oveta imwe eshi a pula ouyelele kutya omalishangifo omahoololo otaa ende ngahelipi.
Okwa itavela kutya eengudu domilameno otadi nyenyeta kombinga yaShaningwa shaashi efimbo lomahoololo.
“Ngee oinima ya etwa poluheela kokomisi yomahoololo, pelesidente oku na oshinakuwanifa shokwiiwapaleka opo a kwashilipaleke omukalo womahoololo a manguluka, e li pauyuki nokuli mondjila,” Osho a ti ngaho.
Shaningwa okwe liamena eshi a li moshoongalele omo ndee ta ti eengudu dopolitika nadi tye tangi eshi va ifana okomisi yomahoololo ve i pulaapule.
“Nava tye ashike tangi kutya ovaleli vopombada vepangelo ova kundafana nokomisi yomahoololo opo i kufe ko eenghaku ndee tai shangifa ovahoololi kutya nee ovongudu ilipi yopolitika,” Shaningwa osho a ti ngaho.
Okwa ti oinima oyo ya kundafanwa oi na sha naye shaashi oku li oshilyo shopaliamente noKabinete.
Okomisi yomahoololo Etitatu oya ti otai ka yandja ouyelele moule wefimbo lixupi.
Omuleleli wongudu yoPopular Democratic Movement McHenry Venaani okwa pula kutya omolwashike kwa li ina ifanwa ongomuleli wongudu yomilameno ngee Shaningwa okwa li a ifanwa ongoshilyo shopaliamente.
“Shaningwa oshilyo shoKabinete oha kala moKabinete a pomunghulo wapelesidente a fa omunambelwa mukulu, ashike keshi nande ominista yoKabinete, onghee nee Hengari okwa puka,” Osho a ti ngaho.
Okwa ti moshinima omu inamu ulikwa nande ouyuki.
Omukulunhuwiliki wokomisi yomahoololo, Petrus Shaama, Etitatu okwa ti, okomisi eshi ya li ya ya koshoongalele keumbo lopashiwa oya ulika ashike elitulemo layo mokuwanifa po eenghona dayo dopakotamhango.
Okwa ti okomisi otai dulu okukandula po omalimbililo okupitila meenghundafana dopamufika novakufimbinga va yooloka.
“Okomisi yomahoololo ihai hoolola kutya pelesidente na ufane lyeye koshoongalele shaye,” Osho a ti ngaho.
Shaama okwa ti okomisi oya kundafana nghee i na okuxwepopaleka omalishangifo omahoololo nonghee i na okuwilika omahoololo a manguluka, opauyukin nokuli pamufika.
