Ongungdu yompilameno yomoSouth Africa yedhina Economic Freedom Fighters (EFF) mewiliko lya Julius Malema oya gandja ombedhi kwaashono tayi ithana kutya, euvitho nayi lyaali pauntu tali ningilwa gumwe gwomiilyo yongundu yo Economic Freedom Fighters (EFF), mo Namibia Michael Amushelelo ngono ali akwatele komeho ekanka omolwa onkalo yokuhena iilonga mokati kaagundjuka.
“Omanga tu uviteko nokusimaneka etokolo lyompangu lyopaveta, otwa itaala kutya ngoka ali ta popile mboka yadhimbiwapo noyaana ewi lyokwiipopila ina ningilwa euvitho lyonayi nokumutindila aninge eindilo lyokwiifutilamo mondjedhililo onga omuntu ngoka aninga oshinima shoka shanika oshiponga” Malema tati. Omuwiliki gwo EFF gwa South Africa okwapopi ndhika konima sho Amushelelo ali a shanga kepandjalye lyokomalungula kutya ota kaya mekanka lyokwiiteka iikulya omolwa onkalo ndjoka eli muyo mondjedhililo, nomolwa eiyuvo kutya mboka ali ta kondjele oyemu dhimbwapo na ihayemupe omukumo nomakwatho.
Omupevikuluntu wiliki (Deputy Commissioner) Veikko Armas gwondjedhililoyaVenduka moka muna Amushelelo okwati kutya, omunandholongo nguka ina iteka iikulya.
Efano ndyoka tali adhika komalungula nalikale eli thanekwa pethimbo ali aya kompangu, pompito ali a mono yokulongitha ongodhi yopeke (cellphone).”Keli mekanka lyoku iteka iikulya, okwali te popi naye ongula onene na inalombwelandje kutya ota kaya mekanka lyondjala.
Okwali aya kompangu noko owala ali iithaneke efano ndyoka molwashoka ondishi uukwatya wiikutu mbyoka ali a zala.
Kapuna omunandholongo apitikwa okukala nongodhi mondjedhililo, nakale owala amono ongodhi sho ali kompangu”Armas tati.
Amushelelo kepandjalye lyokomalungula okwanyola tati kutya onkalamwenyo ye otayiti sha komuntu nokwali ena eitaalo kutya aantu oyendji ota yaka holoka komeho gondjedhililo esiku kehe tayapula amangululwemo mondholongo.”Otandiyi mekanka lyondjala nondahala opo ndi egululwemo mondholongo. Ota ndi kala mekanka lyondjala sigo nda mangululwamo mondholongo.
Ngele otesi opo ndi adhe emanguluko lyandje nena osho nashi ningwe, nondiwete kutya epangelo nali tameke okulongekidha li egululendjemo mondholongo nenge li tameke okulongekidha onzapo yandje yeso, ashike ita ndi ka tsikila onga omweeedhililwa mondholongo gwopapolitika”Amushelelo tati.
EFF tati kutya”e edhililo mondholongo lya Amushelelo okumu imba kaahakwatathane naakwashigwana onga omunapolitika omunandjungu noku hwahwameka oshigwana shikondjele oonkalo dhili nawa maaniilonga aaNamibia”. Ongundu yo EFF tayi popi “Amushelelo okwayi mekanka lyondjala shili ompinge nonkalo ndjoka eli yomondholongo ndjono kaayina uuyuki shono shiniwe konima konkalo yopapolitika. Ongundu yo EFF ya South Africa oya pula epangelo li talulule etokolo shoka tashi ithanwa emangepo lyopapolitika notayipula iigwana muuyuni yitale kutya shoka tashiningwa kepangelo lya Namibia oshili ompinge noveta yuuthemba womuntu”EFF tati. Amushelelo okwali akala mondolongo okuza mu Maalitsa konima sho ali a mangwapo nomunandjungu gwopapilitika Dimbulukweni Nauyoma osho Inna Hengari gwo Popula Democratic Movement. Emangepo lyawo olyali lya holoka shoyali ya unganeke ehololomadhiladhilo lyopambili moshilongo omolwa onkalo yokwaahena iilonga mokati kaagundjuka aaNamibia shono shali shaningwa mesiku lyokudhimbulukwa emanguluko lyoshilongo. Amushelelo na Nauyoma oya taalela omageelo ngashi okuyona oveta yomaihumbato mokati koshigwana, oshowo oku hanagulapo omaliko goshigwana. Hengari na Nauyoma okwali ya pewa ompito yokwiifutilamo oondola N$5000 ku kehe gumwe, omanga Amushelelo ali a tindilwa iifutilemo kompangu yopombanda moVenduka. Oshipotha shaHengari okwali sha kuthwamo mepeko. Amushelelo okwaliwo apula omukalelipo gwe opaveta Kadhila Amoomo emuningile eindilo opo eegululwemo mondholongo. Amushelelo nakuumeke kopangeshefa, Gregory Cloete ota ya pangulilwa ishewe okungeshefa nokuya momapungulo giimaliwa inaayi pitikwa pampango yoshilongo, oyaliwoo ya longitha iimaliwa yaakwashigwana neuvaneko kutya otaye keyigalula kwagwedhwa iihohela shoka kwali yandopa okushininga. Iimaliwa iikwao okwali hayi shunithwa kwa lata, yo yimwe ta yi longithwa okulanda omaliko gondilo ga Amushelelo.
