OKWA kundanekwa egumbo lyepangelo ya ti aanona yomupresidende Hifikepunye Pohamba oya koka, onkene otaya vulu okuninga omatokolo kutya otaya ningi oongeshefa noolye inaaye shi tseyithila he.
Ndhoka oye dhi popi sha landula onkundana kutya okampani yokamonakadhona komupresidende Hifikepunye Pohamba, Kaupumhote nokamonakadhona komuwiliki gwoOld Mutual Africa oya pewa otendela yoomiliona N$16,4 koNHE yokutunga omagumbo kOtjiwarongo.
Omugandjimayele gwomupresidende shi na sha niikundaneki, Mukwaita Shanyengana okwa ti omupresidende Hifikepunye Pohamba ke na mo sha mushoka shokamonakadhona ke Kaupumhote ka pewa otendela.
Oministeli yi na sha naambyoka yombelewa yomupresidende, Albert Kawana okwa lombwelele egumbo lyotango lyopashigwana kutya Kaupumhote okwa tseyithila he, omupresidende Pohamba kombinga yaashoka a hala oku ya mongeshefa ihe kali nee a thamuna nawa kutya ongeshefa yoludhi luni a hala.
“Omupresidende ke na mo sha moka, ye ishewe iha gandja ootendela.
Kehe gumwe, ongele nee okamonamati nenge okamonakadhona komupresidende nenge omutoolinkundana oku na uuthemba kuye mwene nopakotampango okuninga ngaaka”, omugandjimayele gwomupresidende mumbyoka ya nika iikundaneki, Shanyengana a tumbula ngawo momukanda ngoka a shangela koshifonkundana shoConfidente.
Oshifo shoConfidente osha pitithile ehokololo kutya okampani yedhina Kata Investments yokamonakadhona komupresidende Pohamba kedhina Kaupumhote nokamonakadhona komuwiliki gwoOld Mutual Africa, Johannes !Gawaxab kedhina Taschiona, oya pewa otendela yokutunga omagumbo kOtjiwarongo.
“Aanona yomupresidende oye li aalumentu naakiintu ya koka onkene inaya pumbwa okupula epitikilo nando okulye, nando nee okaakuluntu yawo”, omusamane Shanyengana a ti ngawo.
Omusamane Shanyengana okwa ti omuwiliki gwo-NHE, Vinson Hailulu okwa lombwela egumbo lyepangelo kutya otendela ndjoka oya gandjwa pamilandu nopamalandulathano ngoka ge li po.
Ehokololo ndyoka lya li moshifonkundana shoConfidente inali tya Kaupumhote naangoka ta longele kumwe naye oya pewa otendela moproyeka yokutunga omagumbo ogendji ihe olya tya oya pewa otendela yoNational Housing Enterprise (NHE).
Oministeli yi na sha naambyoka yombelewa yomupresidende, Albert Kawana okwa ti okampani ndjoka yedhina Kata Investments oyi na edhiladhilo ewanawa oku kuta miilonga aakiintu ya adha omilongo ndatu nohayi longele kumwe naandjoka yi na ontseyo nuunongo miilonga mbyoka yedhina Tulipamwe Building Contractors.
Shika hasho shotango kaanona yomupresidende Pohamba shaashi momumvo 2011, okwa lopotelwe miikundaneki kutya aanona ngaashi okamonakadhona wo kamwe komupresidende Pohamba kedhina Ndapanda, kamwe komwaamboka ya li ya pewa ompito niimaliwa oku ki ilonga koChina, sha ningilwe 2009.
Kaupumhote haye awike okanona kaanapolotika yiipundi iinene taka mono otendela yo-NHE, oshoka Sam Shafiishuna Ekandjo, okamonamati kaminista Jerry Ekandjo ngoka sigo omuDesemba 2012 a li ominista yomagumbo nayilwe ka li wo ka pewa otendela yoomiliona N$42 ko-NHE.
Okampani yaSam Shafiishuna Ekandjo yedhina Oruhapo Property Solutions oya li ya pewa otendela yokutunga omagumbo ge li omathele gaali nomilongo mbali nagaheyali (227) koLiindili, yo opo owala ya li ya shangithwa omasiku sho ga li 19 Maalitsa 2012.
shinovene@namibian.com.na
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
