Oministili yOikwameni, Omatembu nEameno oya londwela oshiwana kutya opu na ovakengeleli tava ti ovanambelewa voministili, tava pula oimaliwa opo va “endelelife” omikanda dopashiwana nadikwao ngaa dokukala moshilongo.
Elondwelo ola landula eelopota dovanhu tava popi oipupulu kutya ova dja koministili yoikwameni notava pula va futwe opo va yandje omikanda neembapila dokukala moshilongo.
Paemhito dimwe, oonakuningwa oihakanwa okwa li va pewa omikanda dihe shi doshili, osho tashi dulu oku va mangifa po noku va kanififa oimaliwa.
Momukanda wa yandja Etitano, omukulunhuwiliki woministili Nghidinua Daniel okwa ti oonakuningwa oihakanwa vahapu ovadjaidjai ovo tava kongo omikanda dokukala moshilongo.
“Vamwe kave na oinima aishe oyo ya pumbiwa opo va dule okumona omikanda okupitila momilandu dopambelewa ndele shaashi kave na nghene, ova wila momake ovakengeleli, luhapu tava futu oimaliwa ihapu, i dulife pwaayo oministili hai pula,” osho a ti ngaho.
Daniel okwa weda po kutya moiningwanima ikwao, oonakuningwa oihakanwa okwa li tava dulu okumona omikanda ngeno ova ningile omaindilo okupitila pamilandu domondjila ponhele yokutwila momapya.
Oministili oya holola kutya ovatamanekwa ohava longifa omadina “Martin Tangeni” ile “Martin Tangeni Ndeitwa” manga tava popi oumbudi kutya ova dja koministili.
Daniel okwa yeleka kutya oministili kai na nande ovanailonga vomadina a tumbulwa ndee ta indile oshiwana shi kale shi shii kutya omikalo di li ngaho odoumbudi nokaheka.
Okwa popya kutya oministili ihai longifa omikalo di li ngaho, omulandu wovapokati nokapu na nande omunambelewa a pitikwa a pule ovaningi vomaindilo oimaliwa.
Daniel natango okwa itavela kutya otashi dulika pu na ovanambelewa vamwe tava longele kumwe novafufi, ta londwele kutya keshe omunhu ta kufa ombinga moulingilingi ile momakengelelo ota ka taalela oilanduli yopaveta.
Oshiwana otashi indilwa shi lopote oiningwanima inai yela nawa konomola yoministili 081 143 6265, ile koshitaashi shpolifi shi li popepi.
