Shalandula omafiku a yooloka odula tai loko, ngoloneya waShikoto Sacky Kathindi okwa indila ovanafaalama aveshe moshitopolwahoololo va tameka okulongekida omapya nokukuna oikunomwa ya wana opo ku kwashilipalekwe kutya eefamili odi na oikulya ya wanena.
Kathindi Etitano, eshi kwa li ta popi noNampa, okwa ti omuloka muwa koitopolwa yokonooli yaNamibia edidiliko liwa lefimbo lokukuna oikunomwa.
“Osha fimana opo tu tameke okupulula nokukuna mangha odula tai loko nawa nedu la tuta nawa, kutya nee epya oli fike peni ile oli li peni.
Okuloga pefimbo otaku eta tu teye eteyo liwa medu eli la lokwa,” osho a ti ngaho.
Nande opu na omikundu domeva a yela ovanhu noinamwenyo moitopolwa imwe yoshitopolwahoololo, ngoloneya okwa yeleka kutya odula oya tutika nawa edu, osho tashi dulu okuvatela oikunimwa i kule nawa nokweeta elineekelo leteyo liwa movanafaalama.
Ovanafaalama vashona momukunda Cham-Cham moshikandjohoololo shaNehale Lya Mpingana nomikunda dopomudingonoko moshitopolwahoololo, ova tameka okupulula omapya avo nale osho tashi ulike kutya efimbo lokulonga omapya.
Momapulaapulo noNampa Olomakaya, omunafaalama Mateus Shioke okwa fatulula etokolo laye lokutameka okupulula diva mangha edu a lokwa nawa.
“Embakumbaku otali longo epya alishe, ndee onda faneka okukuna oikunomwa ihapu ya yooloka oyo hai dulu okuxupa moshikukuta, mwa kwatelwa epungu, omahangu, oilyavala, omakunde, eefukwa nomakanuwa ashona,” osho a ti ngaho, ta popi yoo kombinga yefimano lokukuna oinima ya yooloka opo ovanhu va kale ve na oikulya ya wanena omaumbo moshitopolwa eshi hashi kala shakukuta.
Kaume kaye, Selma Simon, okwa holola ohokwe yokutameka okulonga epya diva.
Okwa tameka nale okuka ombidi oyo hai kulu nawa pefimbo lodula nohai landifwa kondilo neenghono konooli yaNamibia.
“Ombidi ei ya mena nohai mene nawa nande inai helelwa, edidiliko la yela kutya edu ola tuta nawa nomuloka omuwa nokumeneka eembuto nokukulika oimeno,” osho a ti ngaho.
Simon okwa weda po kutya popepi nOshivelo, ovakalimo vamwe ova tameka nale okukwata omafuma oo hee ya ashike konima yodula ya kula, tave a landifa koveendinandjila va dule okumona oiyemo.
Omunafaalama Gideon Andreas a dja komukunda Okapanda moshikandjohoololo shaNiipa okwa lombwela Nampa kutya okwa hoolola okutameka okulongekida epya laye diva, opo a kwashilipaleke kutya epya laye oli li pamufika wokulongwa ngee efimbo lokukuna la fiki, osho tashi dulu okweeta eteyo liwa unene.
“Efimbo ola fa lili nawa, odula oya fika noya kala nokuloka nawa fiyo opapa. Ofamili yange kai na nande etomeno lokukateka okukuna oikunomwa,” osho a ti ngaho.
Okwa weda po kutya efimbo eli, okwa hala okukuna unene omapungu shi dulife omahangu, shaashi epungu ola fima unene noli holike meumbo laye.
-NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
