Bishop Lukas Katenda wongeleka yedina Reformed Evangelical Anglican Church of Namibia (Reach) okwa udaneka okutunga eongalo kOnamukulo nande ovanamukunda otava kondjifa oshinima eshi.
Katenda okwa lombwela oThe Namibian Etitatu kutya ongeleka yaye oya ninga eindilo ledu momukunda Ohangwena momafiku 24 Desemba opo i tunge ongeleka, eumbo lomufitaongalo, okinda noshaala yovanyasha.
Mwene womukunda, Justina Hamukwaya, nande ongaho, eindilo eli okwe li anya, ta ti kapu na onhele noshiwana inashi li panda.
“Momukunda kamu na onhele iwa nokutunga ongeleka. Opwa li oshoongalele shoshiwana oko ovanamukunda kwa li va shiifwa va yandje omaliudo avo kombinga yeindilo,” Hamukwaya osho a ti ngaho momukanda wa nyolwa momafiku 30, wa monika koThe Namibian.
“Koshoongalele ova tokola kutya inava hala eongalo longeleka yoReach Namibia kOnamukulo,” osho a ti ngaho. “Ngee opu na omukalimo oo a hala okuya kongeleka yoReach Namibia, nave shi ninge pamwe pelili.”
Katenda okwa ti kutya omukunda ou na ekwatafano lopandjokonona nongeleka, shaashi momukunda omu omo mwa dalelwa omupedu bishop woReach Namibia, Nelson Ndakevondjo.
Okwa weda po kutya ongeleka oya shasha ovakalimo vahapu momudo 2020 no2021 noi na oilyo oyo hai di momukunda omo.
Katenda okwa ti kutya ongeleka oi na okuya komesho ndee tai patulula omivelo dayo momukunda muMarsa neudo.
“Ongeleka yetu opo i na okukala kutya nee (ovanamukunda) ova hala ile inava hala,” osho a ti ngaho.
Katenda okwa ti, Reach ota ka konga vali epitikilo kelelo lomukunda noku na okuya komesho ndee ta tungu pedu layo vene.
“Ekotamhango laNamibia ola yandja emanguluko lokulinyongamena. Itatu tauluka oveta. Ovanhu ove na oufemba wokuhoolola opo nonghee ve na okulinyongamena,” Katenda osho a ti ngaho.
Okwa weda po kutya elalakano longeleka okwaandjakaneka ondjovo nokuyakula oshiwana okupitila momaalikano, exungomwenyo noyoongalele yopanghalafano.
Katenda ota ti kutya ekondjifo longeleka ola dja kongudu ishona yoilyo yaAnglican momukunda.
“Onda lombwelwa kutya ova ti inava hala ongeleka ei shaashi momukunda omu na nale eongalo laAnglican. Katu li ominge nongeleka yaAnglican,” osho a ti ngaho.
Katenda okwa ninga bishop woReach Namibia momudo 2019.
Hamukwaya kakwa li nande a monika Etitatu opo a tye sha.
Omupopiliko welelo lopamufyuululwakalo laUkwanyama Andrew Naikaku okwa tumina oThe Namibian kuHamukwaya.
“Ei oilonga yamwene womukunda nelenga lakula momukunda,” Naikaku osho a ti ngaho.
Momudo 2024 ovaleli vamwe okudja kelelo lopamufyuululwakalo lUukwambi nopolifi moshitopolwahoololo shaMusati okwa li vati va teyaula po ongeleka komukunda Oshuudhi-B.
Ongeleka, Omwene Tumange Ministry, okwa li tai tamanekwa kutya oya ninga po yokwoongela oimaliwa ponhele yokuudifa ondjovo yomwene oshali.
Konima yodula, ohamba yaNdonga Fillemon Nangolo okwa li a popya kutya eengeleka dopamhepo oda ninga omukundu shaashi okwa li tadi teya po eefamili nokwa li tadi lundilile ovanhu omaulodi da manguluka puhe na oumbangi u popile omapopyo a tya ngaho.
Oshinima eshi okwa ti ohashi eta omatopokafano noutondwe meefamili, pokati kovashiinda nomoshiwana, osho shi li ominge nomahongo opambiibeli.
Pefimbo opo, okwa ti elelo lopamufyuululwakalo laNdonga itali pitike nande eengeleka dopamhepo odo tadi ningi dihapu moshitopolwa shalo.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
