Kalyongo e shiivikile nawa okuvaka eedalate dolusheno mOvenduka aishe natango okwa mangwa po vali.
Oshinima eshi okwa li sha shiivifwa onghela ongula kepandja lomayakulo opolifi yoshilando komalungula.
Omufeekelwa, Moses Moses (35), okwa kala nokutamanekelwa oiningwanima yokuvaka eedalate dolusheno luhapu, mwa kwatelwa koitaashi yakula nomeenhele doshiwana.
Opolifi oya ti ekwatepo laye laxuuninwa ola landula ondjokonona youmbudi woinima ei ikulu okudja ngaa omido heyali da pita.
Moses okwa mangelwe po nale momudo 2023 shi na sha noumbudi weedalate dolusheno koDawid Bezuidenhout School moKatutura (CR 210/04/2023), oko vati a longifa omukalo we lifa wokupatulula oukefa volusheno nokuteta eengodi.
Okwa li a monika ondjo ndee ta futifwa oshimaliwa shi fike poN$12 000.
Okwa kala yoo vali nokumangwa po oikando ya yooloka molwoumbudi woludi eli, mwa kwatelwa noiningwanima yomuApilili 2023 naMarsa 2025.
Moshiningwanima she lifa, oilyo yoshikondo shomalusheno shewiliko loshilando, oyo kwa li tai longo pendjiji leefitola dimwe moshilando, vati oya mona po oinima inai yela nawa, ndee tai hange Moses a hondama moshiilinga nelalakano lokuvaka eedalate dolusheno.
Okwa li a dimbulukiwa nawa poshiningwani opo, ta mangwa po kopolifi yoshilando ndee ta twalwa koshitaashi shopolifi koKatutura ku ka ningwe omakonakono.
Oshoondaxa, ovo kwa li tava patolola okwa li ve mu kwata natango mangha kwa li vati ta teya okakefa kaNamPower.
Okwa holoka momhangu yamangestrata moKatutura Omaandaxa, omo kwa li a pewa obooloha yoshimaliwa shi fike poN$2 500.
Opolifi oya koleka kutya natango oku na oibofa ya yooloka inai pwa.
Opolifi otai pula oshiwana shi kale nokulopota oiningwanima ei meendelelo.
Shimwe vali, ovo hava lande edalate domalusheno da vakwa nava dimbulukwe kutya navo ova talika ko kutya ovakufimbinga moimbuluma ei notava dulu okutaalela oilanduli, shaashi otava xwaxwameke nokukaleka po okulanda oinima ihe li paveta.
Omakonakono moshikumungu eshi otaa twikile.
