Gazprom ta mono oshipambu moKudu gas

NAMIBIA ota ka tseyitha mbala ombapila ompe yokulonga niikwamahooli.Etseyitho ndika olya tegelelwa li ka popye kutya ehangano enene ha li longo nosho okulanditha omuku noshowo iikwamuku lyoko Russia lyedhina Gazprom otali ningi omunashipambu mokutungapo ehangano lyomuku gwaKudu.

Gazprom okwa tegelelwa aye mekwatathano nomahangano ngaashi lya Tullow oil, Itochu Corporation noshowo neeNamcor ehangano lya Namibia moshipungu shiikwa mahooli.Okwa tegelelwa Gazprom a tameke okutunga oshitaasi sholusheno shotango hashi longitha ogasa pOmbaye.Iilonga mbika otayi ka pula oodola dhAmerika obiliona yimwe noshinkwanu mbali oya tegelelwa yi tameke mu January na oya thanekwa yi ka manithwe momumvo 2013, uuna Kudu Gas field tayi tameke okupomba ogas okuyi ukitha komunkulofuta.Owebsite yinasha niikwankondo oya endulula oohapu dhomunambelewa gumwe mUuministeli Woomina Niikwankondo sho a ti Gazprom ota kala ena iipambuliko mehangano ndika lyombapila yokumina ndjika.Ombapila yongashingeyi oya kusha nale nombapila ompe oya pumbwa okugandjwa, naandjika oya tegelelwa okutseyithwa mbala.Nonando mboka ta ya kutha ombinga mwaashika inaya tseyithwa natango, Tullow Oil okwa tegelelwa a ka longe ongo omuwiliki gwiilonga ya Kudu gas.Omuwiliki gwa Gazprom International Boris Ivanov okwa popile poshigongi shiikwankondo nomahooli muAfrica moCape Town kuyele omwedhi nguka kutya Eskom ota ka landa olusheno lwoonkondo 500 megawatt okuza moomegawatt 800 ngoka taga ka longwa koshitaasi shopOmbaye, omanga olusheno ndoka lwa hupupo ota lu landwa po kaakwashigwana yaNamibia.Ehangano lyomahooli lyaNamibia olya li lya koleke euvathano na Gazprom muJuni nuumvo li kwathele mokungongapo nkene ogas ta yi pombwa okuza momeya nokuya komunkulofuta.Iimaliwa ta yi longithwa mushika ota yi kongwa oku za maapunguli yomuuyuni unene miilongo yoPuuzilo wopokati noshowo moLebanon.Namcor okwa li nooperesenda 10 mombapila yotango ya Kudu gas, omanga Tullow Oil a lina ooperesenda 70 na Itochu ooperesenda omilongo 20.