Hamushangandjai wehangano ledina Namibia Bus and Taxi Association Pendapala Nakathingo okwa ti ovashingi veetekisa itava ka xupa vali ngaashi shito ngee eendado domahooli da i pombada.
“Eelefa otashi dulika di ninge ondilo ngee omahooli a wedwa nande ovayakulwa otashi dulika va kale inave shi hafela, ashike moshikondo sheetekisa inamu ningwa nande ewedelo fiyo opapa,” osho a ti ngaho.
Okwa weda po kutya ehangano otali ningi eenghundafana novakufimbinga va tokole kutya otava wedele naingapi.
Oshilyo shehangano loSeven-Seaters Association, Pablo Benjamin okwa ti eendado dakeshe efiku odi na okuya pombada neenghono, novashingi otava ka longifa oshimaliwa shihapu momahooli manga oiyemo tai twikile nokukala ya ngabekwa.
“Eshi otashi ninipike oiyemo, osho tashi eta omalweendo ashona novashingi vamwe otashi dulika va xulife po oilonga shaashi itava dulu vali okuya komesho neengeshefa davo ngaashi shito,” osho a ti ngaho.
Okwa indila epangelo li talulule nokuwedela eendado doyeendifo ngaashi tashi dulika, ta weda po kutya ovashingi omo va tala moiyemo ei opo va xupe.
“Okukundafana payukililo nomahangano oyeendifo okwa fimana opo kuudikiwe ko nawa omikundu nokukwashilipaleka ouyuki neendado di lixwepo.
Eembinga adishe otadi dulu okufaneka omikalo odo tadi amene omaxupilo ovashingi voyeendifo manga yoo taku talwa komikundu dopashimaliwa dovalongifi voyeendifo,” osho a ti ngaho.
OMAKONDJIFAFANO
Ovatotiveta ova yandja oushima ketokolo lokuwedela omahooli, tava ti otali kondjifafana nomapopyo omafiku aa taa ti oshilongo oshi na omahooli a wana.
Omuprima minista Elijah Ngurare omwedi ou okwa ti oshilongo itashi ka mana po nande omahooli, shaashi omahooli asho ahapu ohaa di koNigeria, India nokoEurope. Ngurare eshi okwe shi popya konima oilongo ngaashi Botswana a shiivifa kutya otashi dulika va mane po omahooli diva sha landula oita oyo i li koilongo yokoushilo wopokati. Ngurare okwa ti oshilongo ohashi kufa ashike eepelesenda domahooli di li lwopo20 fiyo 30 koilongo yokoushilo wopokati.
Omuleli wongudu yoPopular Democratic Movement (PDM), McHenry Venaani okwa ti epangelo nali lande omahooli koNigeria koDangote Group opo li kwashilipaleke kutya oshilongo oshi na omahooli a wana.
Venaani okwa ti omapopyo aNgurare kutya oshilongo oshi na omahooli a wana edidiliko kutya epangelo inali lilongekida.
“Natu longifeni ohokwe yaDangote moNamibia … okufuta ko oshimaliwa shi fike poN$500 kwepangelo oshinima shiwa, ashike otashi vatele nee oshilongo fiyo onaini?” osho a ti ngaho.
Oshilyo shongudu yoIndependent Patriots for Change (IPC), Ferdinand Hengombe okwa ti oshinima eshi “ehepeko lovakwashiwana ovo tava mono nale oixuna”.
Okwa londwela kutya ewedelo lomahooli oli na oilanduli yopaliko ya endelela, mwa kwatelwa ewedelo leendado doyeendifo, oikulya nomikundu keengeshefa dishona.“Ito dulu kutya oshilongo oshi na omahooli a wana ndee natango oto wedele omahooli.
Ngee epangelo eli oli na shi li omahooli taa wanene omafiku o-90 momungulilo, nena shimwe shomoinima ei ivali oshi na okukala shi li mondjila,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
