Eumbo longushu yeemiliyona di li N$4.5 mOvenduka lomutamanekwa moshipofa shoFishrot Tamson ‘Fitty’ Hatuikulipi, koAussblick otali tekauka po.
Hatuikulipi, oo e na omaliko ongushu yeemiliyona di li lwopoN$40 moshilongo ashishe, okwa li a mangwa po muNovemba 2019 shi na sha noshikumungu shoFishrot.
Mangha kwa li ina kwatwa po, okwa hangika ta tungu eumbo, eekilomita ashike dishona okudja peumbo lepangelo mOvenduka.
Ashike nee, etungo leefulula nhatu kakwa li la manifwa.
Ndele paife, eengudi dimwe odo di kwete ofulula onhinhatu yeumbo oda vakwa ko, osho sha eta ombinga imwe yofulula onhivali nekuma li teke po.
Oitungifo oya halakana momudingonoko wetungo, omangha oswimming pool meni leumbo nayo ya mona oixuna.
Petameko lomwedi ou, eshi ovalopoti voThe Namibia kwa li va talela po etungo eli, ova hanga mo omulumenhu wedina Maseva.
Oku na mo okanhele meumbo olo inali pwa okutunga, opo a tula ombete nomafiya opamufyuululwakalo a tulwa monduda imwe.
“Onda lombwelwa ndi kale omu.
Ohandi kelele oitungifo imwe ihava kwe po,” Masave osho a ti ngaho.
Omhangu oya ulika ovanhu ovo ve na oshinakuwanifa shokuwilika etungo eli ponhele yepangelo, ashike ova ti kave shii kutya meumbo omo omu na Masave, voo opo tava ningi etokolo kombinga yonakwiiwa yalo.
“Onda popya naFitty kombinga yeumbo ndee opo hatu ka kundafana kutya otapa ningwa shike, hatu tale kongushu yetungo,” Harald Hecht osho a ti ngaho, umwe womwaavo va ulikwa komhangu va file etungo oshisho ponhele yepangelo.
Elombwelo okudja komhangu la yandjwa momudo 2020, konima yomwedi eshi Hatuikulipi a mangwa, ola ti: “Omaliko ovatamanekwa inaa kumwa komunhu, naa kalekwe po nokwa tulwa mewiliko lovafilishisho.”
Ouyelele oo wa dja kombelewa oko haku yandjwa omikanda domaumbo, owa ti eumbo ole hangano ledina Leobeer Estates Fifteen CC.
Ehangano lokunyolifa eengeshefa ola ti ehangano eli ola Hatuikulipi eepelesenda efele.
Leobeer Estates Fifteen CC ina holoka mo nande momukanda womhangu womudo 2020, ile onhele opo eumbo la fikama.
Nande etungo inali tumbulwa mo momukanda womhangu, natango ola teelela okuya momake epangelo shaashi elombwelo ola kwatela mo omaliko aeshe ovatamanekwa.
Etungo eli leefulula nhatu Hatuikulipi okwa li a tumbula kutya oli na ongushu yeemiliyona N$4.5 momukandaano waye wokomhangu momudo 2020.
Ovawiliki vomaliko ovo va ulikwa komhangu ova ti ove wete kutya etengeneko laHatuikulipi oli li mondjila nola yuka.
“Inali puka naana shaashi eumbo olokaungulita loo oli li konhele iwa,” Hecht osho a ti ngaho.
Ouyelele oo wa dja kombelewa i na sha nomadu owa holola kutya edu ashike olo alike okwa li la landwa koshimaliwa shi fike poN$800 000 momudo 2011.
She likolelela kuHecht, onhele ashike oyo aike paife otai dulu okukosha omiliyona oshinghwanyu nhano.
Oilonga yovawiliki vomaliko imwe oyo kulandifa po etungo mangha inali kanifa ongushu, ndee paife otava tale koshinima eshi tashi dulu okuningwa po va kwatele po ongushu yetungo.
Ovawiliki vomaliko ava ova ti kapu na naana ewiliko lokuya mo meumbo omu shaashi natango eumbo inali pwa okutunga.
Omaliko aHatuikulipi okwa li a ya momake epangelo momudo 2020 molwoshipofa shoFishrot, ndee oshinima eshi otashi twikile fiyo oihokolola yaye yoimbuluma ya manifwa momhangu yopombada yaVenduka.
Oikundaneki okwa li ya lopota kutya Hatuikulipi nomukulukadi waye ova twalelwe komhangu momudo 2023 shi na sha noitungifo inai futwa pefimbo eumbo eli kwa li tali tungwa.
Konima a hombola omonakadona waEsau, Ndapandula, momudo 2011, Hatuikulupi okwa landa omatungo e li lwopo15 moNamibia keemiliyona di li N$40 pokati komudo 2014 no2019.
Ovalihomboli ava ova hombola ohombo yomaliko ehe li mumwe.
Momukanda wa monika koThe Namibian Hatuikulipi okwa popya kutya oku na omatungo a yooloka: limwe koCimbebasia mOvenduka longushu yomiliyona oshinghwanyu nhano, nalimwe li li kOmbaye longushu yoshimaliwa shi fike poN$650 000.
Omaliko aye amwe okwa li oyeendifo: eshete loC63 AMG, N$800 000, Golf 6 yomodela yo2011, N$360 000 noToyota Hilux yomudo 2005, N$160 000.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
