OOKAMPANI ndatu dhokukwata oohi, dha yambuka moshitopolwa shaHardap dhomadhina Mosia, Morcar naHardap, dha yambidhidha etungo lyombelewa yoSwapo yoshikandjo shaRuacana noodola dhaNamibia omayovi omilongo ntano nagatano (N$55 000) sha ningilwe meti 28 Auguste 2014 mondoolopa yaRuacana yedhina Oshifo moshitopolwa shaMusati.
Mondoloopa ndjoka yaShifo omo tamu tungwa ombelewa ndjika, tayi adhika pooha naandjoka yakaansela gwoshikandjohogololo shaRuacana.
Kahewa kombelewa ndjika, meme Katrina Hanse-Himarwa, ngoka e li gavena yoshitopolwa shaHardap, oye a taamba ko omagano goshimaliwa shika kaakalelipo yookampani ndhika ndatu dhokukwata oohi.
Omusita Gunther Mungunda ngoka a gandja otyeke yokampani Mosia naMorcar Fishing kumee Katina Hanse-Himarwa nomuunganeki gwoSwapo moshikandjo shaRuacana Erastus Mashina, oku uvaneke kutya ookampani dhawo ndhika otadhi ka tsikile nokuyambidhidha etungo lyoSwapo moRuacana ndika sigo tali pu.
Omusita Mungunda tati, shampa aluhe pwa piti omumvo, ohaya ningi omayalulo giiyemo yawo nohaya kutha mo aluhe oshipambu shontumba nenge iipambu yontumba yi ka kwathele moshigwana. Tati oya tokola nee kutya shimwe shomiipambu taya pe po oshigwana otashi kala taye shi tula metungo lyombelewa yoSwapo yaRuacana sigo tayi pu okutungwa.
“ Aaruacana, oye li aamwameme aamati naakadhona muJesus Kristus, nashi gavena gwetu Hanse-Himarwa e twi indile tu mu kwathele, inatu kwatakwata. Otwa tokola tu kale hatu mu kwathele ngashi tatu shi ningi ngeyi,” omusita Mungunda a ti ngawo.
Sho a taamba ko omagano gootyeke ndhika mbali, yimwe yooN$50 000 nonkwawo yooN$5 000, gavena Hanse-Himarwa, okwa lombwele aawiliki yoSwapo yomoshikandjo shoka shaRuacana kutya otaka kondja sigo kahewa ke ta pu kutungwa.
Gavena yaHardap ta pandula noonkondondo omusita Mungunda nayakwawo ayehe yookampani dhoohi ndhoka sho ya kwathela ngeyi mokutungitha ombelewa yoSwapo moRuacana. Tati iilonga yetungo lyombelewa ndjika oya tamekele momumvo 2010 nokuwete kutya otayi humu nawa komeho. Tati ke wete we yi li kokule nokupwa.
Gavena okwi indile kookampani dhimwe, komahangano gi ili nogi ili nosho wo kaanangeshefa ngashi Aakiina nosho tuu koohandimwe ya kwathele opo oproyeka ndjika yokutunga ombelewa yoSwapo moRuacana yi pwe meendelelo ngashi tashi vulika, ndele iilonga yombelewa ndjika tayi tameke neyakulo lyoshigwana.
Gavena Hanse-Himarwa okwa lombwela aawiliki yoSwapo moRuacana kutya ombelewa yoSwapo onkulu moRuacana moka, inayi hanagulwa po nande. Nayi kale po yi longithwe shilwe shi ili yo wo yi kale ongendhindhilikondjokonona koshigwana shokomongula.
“Onda hala okwiindila nesimaneko noneifupipiko enene oshigwana ashihe shaNamibia, mu yambidhidhe iilonga yetungo lyombelewa yoSwapo moshikandjo shaRuacana, unene kombinga yoosamende, yiipeleki, omitenge, oopainda, uutiyelesa, omakende, oolama dhomiyelo nodhomakende, omiyelo nooparafona,” gavena Hanse-Himarwa a ti ngawo.
