Epangelo ola hala okushila ko keeveta nokomilandu li kelele oumbudi weengodi dolusheno oo wa hapupala.
Minista womauyelele nomakwatafano opaungoba, Emma Theofelus okwa ti epangelo ola ninga nale oshoongalele novakufimbinga vomondjila va kundafane nghee ve na okuungaunga noupyakadi ou.
Edi okwe di popya pefimbo loshoongalele shaTelcom Namibia newilikongudu lehangano Omaandaxa.
Eshi oshe ya konima yefiku lomayakulo opamalungula kwa li a piyaanekwa momudingonoko woDorado Valley mOvenduka.
Telcom Namibia okwa ti oumbudi ou okwa li wa piyaaneka omayakulo aye momapandaanda a dingilila onhele oyo.
Ehangano ola indila oshiwana shi lopote omalinyengo taa limbililike popepi naa po pu na eengodi dalo domalusheno.
MuApiilili, Telcom Namibia okwa ti okwa li ta longele kumwe nopolifi mokukelela oumbudi weengodi edi konima yoiningwanima ya yooloka ya piyaaneka omayakulo moshilongo ashishe.
Okwa ti vali okwa longifa oshimaliwa shi dulife peemiliona N$700 okuyambula po nokwaandjakaneka omayakulo aye. Okwa faneka yo okutunga oitaashi ipe momudo 2027.
Oshoongalele okwa li yo sha tala kelunduluko lelelo lehangano sha landula eshi ovanambelewa va kula vatatu va fiya po oilonga.
Onguduwiliki yehangano oya kwashilipaleka Theofelus kutya otai longo ye lipaka mo i kwashilipaleke kutya oinima aishe oya enda nawa pefimbo lelunduluko lelelo.
“Omu na eyambidido loministeli, shaashi eyokomesho leni olo letu.
Onye mu kwete oshikondo shomayakulo opamakwatafano moshilongo omu nonghee nee, itamu dulu okukanifa eenghono,” Theofelus ta ti.
