Ongudu yoIndependent Patriots for Change (IPC) otai tamenekele epangelo edopo lokukatukila onghatu omakonakono omido nhee e na sha vati nekengelelo noumbudi koTransNamib, tai ti okafilukenyenye aka otaka i moshipala okulwifa oulingilingi.
Momukanda wa shangwa Etivali, IPC okwa ti omakonakono a ningwa kehangano lopaumwene ledina Ernst & Young a manifwa muMaalisa 2022 aa holola oumbangi wekengelelo noumbudi kehangano lomashina okolutenda lepangelo.
She likolelela kongudu, olopota oya mona kutya omwaalu woiyemo yoTransNamibia owa kala tau yandjwa uhe li mondjila ndee tai pula opo oshikumungu eshi shi yukifwe kopolifi nokehangano lokwoongela oishoshela ledina Namibia Revenue Agency.
Oya ti minista mukulu womahangano epangelo okwa tumina olopota ei kokakomisi kokulwifa oulingilingi momafiku 29 Maalisa 2022, ashike kapu na nande omunhu a mangwa po, oimaliwa ya alulwa ile efatululo la yandjwa koshiwana la ningwa po.
“Olyelye a dopa okulandula oshinima eshi? Okumwenena oshinima eshi taku twikile otaku holola ashike kutya ovanambelewa ove shi katekela owina,” ongudu tai ti.
Ongudu oya ti pefimbo lomakonakono, TransNamib okwa li e li konima neemiliona di dulife N$23 domauwa ovanailonga ngaashi eependjela, omauwa ounamiti naakwao a wedwa po, osho sha fiya sha tula ovanailonga moupyakadi.
IPC okwa pula minista woimaliwa nomahangano epangelo Ericah Shafudah a fatulule kutya omolwashike oshipofa eshi inashi pula komesho, ta tofa mo ovanailonga ovo ve na oshinakuwanifa shokuungaunga nolopota ei ndee ta koleke yo ngee ovanailonga ova tameka okumona omauwa avo oo kwa li e li konima.
Oya indila yo vali omukulunhuwiliki a yuka mombelewa yOkomisi yOkulwifa Oulingilingi a tale oshipofa eshi, tai ti oulingilingi otau dulu ashike okufindwa ngee omakonakono otaa landulwa keenghatu domondjila.
