Epangelo ola hala okufuta oshipangelo shopaumwene shi ninge omatando ovanaudu vepangelo. Eendokotola oda nyenyeta kutya oitandelo yepangelo i li o-20 moWindhoek ihai longifwa sha shaashi kapu na omiti.
Oshinima eshi osha shangwa momukanda womafiku 24 Apiilili, wa shangwa koministeli youndjolowele, tau lalakanene okuyeleka omusholondodo wovanaudu vepangelo va pumbwa omatando moshipangelo shaKatutura.
Omukanda, wa monika koThe Namibian, otau pula elongelokumwe pokati koipangelo yepangelo noshipangelo shopaumwene shoRhinho Park Private Hospital.
Oministeli oya popya kutya epangelo noshipangelo shopaumwene shoRinho Park otava i melongelokumwe li li mouwa wavo aveshe omo ovatandi vepangelo tava ka longifa oitandelo yoshipangelo shopaumwene ngee itai longifwa, mwa kwatelwa nokonguloshi, momaxuliloshivike nomoyoondaxa yepangelo, ku ningwe omatando ovanadu vepangelo.
Koshi yomalongekido, Rhino Park ota ka yandja oitandelo, oilongifo novanailonga, omanga omatando ovanaudu vepangelo taa ka ningwa koondokotola vepangelo.
Momukanda oministeli oya fatulula kutya oshipangelo shaKatutura oshi na ovanaudu ve li lwopo2 000 va pumbwa omatando, omanga oWindhoek Central Hospital i na ve dulife po7 600.
Omukanda owa shoneka okuninipika omwaalu womatando neepelesenda o-30 moule weemwedi 12 detulomoilonga.
Omukanda owa fatulula osheetifi shomatando aa inaa ningwa natango kutya omikifi tadi ningi dihapu pashiwana, oikwanoipangifo youndjolowele inai wana, oitandelo inai wana nomumbwe yeewino dovanailonga moitandelo.
Omukanda natango owa ti nomumbwe yoilongifo yoshinanena naikwao aishe ya pumbiwa.
The Namibin okwa uda kutya omukanda ou okwa li wa shangwa komupedu kulunhuwiliki Theo-Ben Kandetu.
Kandetu omapulo oo kwa li a pulwa okwa ti naa yukifwe komupopiliko woministeli.
Omukanda natango owa pula opo oishoshela yeefuto i likolelele koNamibian Association of Medical Aid Funds noPublic Service Medical Aid Scheme, ashike eendado otadi ka shunifwa pedu.
“Ashike nee, pamhepo yokuwanifa po oshinakuwanifa shomoshiwana, Rhino Park Hospital ota ka yandja , eendado di li pedu mokuyeleka omusholondodo womatando aa inaa pwa.
Eshi otashi kwashilipaleke kutya oshipangelo osha mona oimaliwa yasho yoilonga nomalutaima ovanailonga, omanga oministeli tai ka mona ouwa weendado da shunifwa pedu eshi tai longifa oshipangelo shopaumwene,” osho wa ti ngaho.
Oshinima eshi osha tukulula okuhaudafano moministeli.
Eedjo domeni oda ti oshikumungu oshi li koshi yomakonakono paife, novambelewa va kula voshipangelo noondokotola otava pula ngee otashi shiva ngaashi shi li notashi dulika ngaa kombinga yoshimaliwa.
“Oshinima eshi otashi konakonwa.
Efimbo lokonima yoilonga olo tali pulwa, luhapu olo natango oitandelo yepangelo hai kala ya manguluka,oshimaliwa otashi kwatwa nawa ngahelipi ngee oipangelo yepangelo otai longifa oitandelo yopaumwene manga yayo ya manguluka?” odjo imwe osho ya pula ngaho?
Eedjo oda weda po kutya okwa nyenyetwa kutya omolwashike oitandelo yopaumwe i na okulongifwa konima yoilonga manga yepangelo ya manguluka ashike ihai longifwa shaashi kapu na ovanailonga noikwanoipangifo.
Ashike nande ongaho, ehangano lovapangi ledina Namibia Nurses Union (Nanu) ola popila eindilo lelongelokumwe, tali ti ovanaudu ova kala eedula va teelela etando molwomikundu edi di li moipangelo yepangelo.
Hamushangandjai woNanu Junias Shilunga, okwa ti oipangelo ei ivali otai nane nombali okuyakula omwaalu wovanaudu oo tau i pombada, nokwa pula epangelo li tunge oipangelo yokuyandja omayakulo aa moitopolwahoololo aishe nokuwedela omatungo omayakulo opaundjolowele.
