Oilyo yopaliamente oya holola omalimbililo kombinga yokuyandja oshimaliwa inashi wana koministili younamapya nounaimuna tali twikile, oshinima osho tava ti ohashi ningwa keshe mudo.
Omuleli wongudu yoLandless People’s Movement (LPM), Bernadus Swartbooi oshinima eshi okwe shi popya mopaliamente Omaandaxa pefimbo leemhata domutengenekwafaneko woministili.
Oministili oya pewa oshimaliwa shi fike pobiliyona imwe oshinghwanyu hetatu.
“Ounamapya nounaimuna owa ulika kutya oo ashike tau dulu oku eta elunduluko, ashike natango otau twikile nokumona oshimaliwa inashi wana.
Tala ashike koNeckartal Dam oshohopaenenwa, natango itai pewa oshimaliwa sha wana. Oshike tashi imbi ondama ei i ninge onhele ya fimana yokulonga oikulya?
“Wetvlei okwa li e na okatomeno kepangelo ashike okwa li ka patwa. Opu na ngaa omafaneko a sha oku ka patulula ndee taka yambidida oshiwana osho sha tala mu ko?” Swartbooi osho a pula ngaho.
Okwa ti kutya eyandjo lomadu otali ninipala, unene ngaa edu lovakwamungu, otali holola kutya kapu na elitulemo.
Okwa londwela kutya ounamapya nounaimuna natango itau pewa oshimaliwa sha wana, osho tashi tula oshilongo moupyakadi wokula shihe na oikulya ya wana manga yoo natango tashi kumu nai eenghendabala dokukandula po okuhena oilonga.
Omuleli wongudu yoNational Democratic Party, Martin Lukato okwa pula oministili opo i nghonopeke opolohalama yokuyandja oikulya yoimuna kovanafaalama ovo tava mono oixuna.
Natango, omunapaliamente woAffirmative Repositioning, Ester Haikola-Sakaria okwa pula kutya omolwashike omutengenekwafaneko inau popya nawa kombinga yomikundu doshikukuta odo da taalela ovanafaalama.
“Ovanafaalama paife ngaha otava xupu ashike moikulya yoshikukuta, ashike inai wana. Oministli otai ningi po shike i ka ndule po omukundu ou?” osho a pula ngaho.
Haikola-Sakaria natango okwa holola omalimbililo kombinga youpangelo voimuna ve li monghalo ihe shi iwa, ta indile oministili i fimaneke okuyambula po mayakulo opaundjolowele oinamwenyo.
She likolelela komutengenekwafaneko, oshimaliwa shi dule pobiliyona imwe oshinghwanyu nhee osha yandjwa koipambele yoilonga ngaashi eendjabi, omanga eemiliyona di dule poN$300 da yandjwa komutengenekwafaneko womayambulepo.
