Epangelo ola itavela kutya ovakwati veeshi ve li 912 ovo va kutwa koshi yopolohalama yedina Employment Redress Programme inava kutililwa, sha landula eyandjo lomaushima okudja kovanawino.
Eitavelo eli ole ya konima ehangano lokuninga omapekapeko omilandu depangelo ledina Institute for Public Policy Research (IPPR) la yandja oushima kopolohalama ei, tali ti oya dopa okuyandja oilonga yaalushe kovakwati veeshi ava va kanifa oilonga molwoulingilingi woFishrot.
Oministeli yOunamapya nOunaimuna, Eeshi, Omeva nOmatendululo omadu oya koleka kutya opolohalama paife oya kuta ovanailonga ve li 2 255 ashike ve li 1 343 ovo ashike va kutililwa, omanga ve li 912 inava kutililwa.
Omupopiliko woministeli Romeo Muyunda, nande ongaho, okwa ti: “Manga handi tambula ko kutya etulomoilonga ola shakeneka omikundu donhumba, oministeli natango oya itavela kutya opolohalama ei yepangelo oya hanga omalalakano ayo opetameko.”
Oministeli oya nukila pomutenya kutya omapopyo oIPPR kutya oya dopa kee li mondjila, tai ti okwa li ya totwa yaamene oilonga, tai kwatele po omaxupilo nokuyambidida ovanailonga ovo va kanifa oilonga yavo sha landula ekangha lomudo 2015 nepato lomahangano.
Muyunda okwa ti ongonghendabala yokuxulifa po opolohalama ei, epangelo otali ka yandja ilonga yaalushe kovanailonga apa tashi dulika noku va futa mo ngee inaku monika oilonga.
“Opo pu na oilonga yaalushe, ovanailonga otava ka pewa oilonga yaalushe momahangano oo a ulika kutya otaa dulu okuyandja oilonga yefimbo lile,” osho a ti ngaho.
Oministeli oya ti oya ninga nale omakonakono momahangano omo tamu dulu okumonika eemhito doilonga.
Opolohalama ei okwa li ya totwa momudo 2020 konima ovanhu kwa li va kanififwa oilonga koulingilingi woFishrot.
Ashike nee, olopota yoIPPR oya mona kutya opolohalama oya piyaanekwa keenamanana, elongo lopauyelele la nghundipala, omatalelo a nghundipala nomikundu detulomoilonga.
Oya ti opolohalama okwa li ya nuninwa okutota oilonga i tya sho moshikondo sheeshi, ashike ouyelele okudja koIPPR, eelopota doikundaneki nomapulaapulo ovanailonga nomahangano ovanailonga nosho yo omahangano eeshi aa holola kutya oya dopa.
Oshinima shimwe sha limbilika ehangano eli osheshi kutya ovanailonga vamwe okwa li va valulwa kutya ova pewa oilonga nande ihava longo alushe.
Olopota oya ti epangelo okwa li la popya kutya ovanhu ve dulife po2 000 moshikondo sheeshi okwa li va pewa oilonga okupitila mopolohalama ei.
Ashike nee, omapekapeko ehangano aa mona kutya ovanhu vahapu okwa li ashike tava futwa va nangala, inava mona eemhito doilonga.
“Aveshe amungala otava futwa ashike vehe na oilonga, puhe na eemhito dokuwedela oiyemo yavo okupitila moilonga yaalushe,” olopota tai ti.
Oya ti kutya ovanhu vamwe ovo inava mona oilonga yaalushe ohava futwa oN$4 000 komwedi.
Omunailonga mukulu woMerlus Cormorant Fishing, Natanael Andreas okwa ti okukanifa oilonga yaye okwa kuma omaxupilo aye neenghono, osho she mu fininika a kanife omaliko aye noimuna oyo a landa manga ta longo.
