Presidente mukulu Sam Nujoma okwa fiya ko eliko longushu i dulife peemiliyona N$100 ngee oinima yaye aishe oya tulwa kumwe, mwa kwatelwa ofaalama yeemiliyona di dulife poN$40.
Eliko eli ola kwatela mo oshimaliwa shi fike peemiliyona N$6.6 keemuma neumbo lakula mOvenduka longushu yeemiliyona N$43 la tungwa kepangelo, ola tongwa momukanda wa nyolwa momafiku 23 Januali.
Etata leliko laye otali i komufiyekadi waye, Kovambo Nujoma, omangha ounona vaye tava fyuulula okupitila moshike fa shoimaliwa shedina Etunda Trust. Nujoma okwa xulifile odula ya dja ko muFebuluali pepupi lomido 95.
Eliko olo la kwatela mo omatungu aye e na ongushu yeemiliyona N$49.6, otali yandje ouyelele wa pumba kombinga yeliko lapresidente mukulu moshilongo omo omitwe doshilongo hadi mono omaumbo okudja kepangelo konima yokufiya po ombelewa neendjabi donghamwenyo.
Omaliko aNujoma otaa wilikwa kuhaende Sisa Namandje, oo a hoolola momukanda waye u na sha nomafyuululo.
Kovambo oye omunhu wotete ta mono omauwa eliko eli, oo a hombolwa kuNujoma mohombo yeliko li li mumwe momudo 1956. Okwa mona oshimaliwa shi fike peemiliyona N$29 meyukililo.
Etunda Trust – oshikefa osho sha totelwa omukulukadi waye novanamati vavali otashi ka mona eemiliyona di li N$29.5.
Oshikefa okwa li sha totwa momudo 2022 omo Nujoma oye a li omumoni womauwa oye auke pefimbo a li momwenyo, nomukulukadi waye novanamati okwa li ovo ovafyuululi konima yefyo laye.
Ovanamati vavali – Utoni Nujoma naZacharias Nujoma – keshe umwe, ota ka mona mo okapambu meemiliyona N$29.5 odo da yandjwa koshikefa.
Utoni ominista ikulu yoipambele yoilonga.
Ondenge yaye Zacharias momikanda doshikefa eshi omwa nyolwa kutya oha longo kuye mwene ongomunawino moipambele yeemina.
Nujoma okwa li yoo e na omatuwa ahamano pefimbo a xulifa, aeshe kumwe e na ongushu yoshimaliwa shi fike poN$500 000.
Oshinima shimwe sha tumbulwa vali momaliko aye eendjebo di li 26 adishe kumwe di na ongushu yoshimaliwa shi fike poN$433 000.
Pefyo laye, okwa li e na eemiliyona di li N$6.6 mombaanga yoFirst National Bank noshimaliwa shi fike poN$7 000 moNedbank.
Namandje okwa lombwela oThe Namibian Olomakaya kutya okwa li a itavela moveta yekotamhango.
“Onghee nee eliko laye ola fa ashike ngaashi lomukwashiwana keshe, tali nyanyangidwa ngaashi oveta tai pula,” osho a ti ngaho.Namandje oo e li omukwateli komesho wefyuululo eli, oshinakuwanifa shaye okukwashilipaleka kutya efyuululo laNujoma ola wilikwa nawa pamukalo wefimaneko.
“Ohandi pula opo fyee nofamili tu pewe omhito tumanife oinima aishe yopaveta ya pumbiwa,” osho a ti ngaho.
Phil ya Nangolo, okwa itavela kutya eliko laNujoma ola pita po peemiliyona N$100. Okwa ti eliko laye otali dulu okukala li dulife peemiliyona omafele nomafele.
