Etokolo Lokabinete lokulidopa mekaleko lotendela youngoba yeemiliona di li N$40 ya pewa ehangano laAmerica otashi dulika li kale li na oilanduli ya piyaana, tashi pitike ovanapolitika va kale nokulidopa meetendela keshe efimbo va hala.
Oministeli younamapya okwa li ya yandja otendela kehangano laAmerica ledina 6th Grain opo li longife outeknika wa nuka po mokuwilika oikunomwa ngaashi epungu, omahangu, oilyavala naikwao imwe.
Omukalo oo otendela kwa li ya diminwa otau nyikwaanyikwa, mwa kwatelwa nomalipulo ngee “opoloyeka ya tya ngaha yopashiwana” nai lineekelelwe ngaa ehangano lokondje yoshilongo.
Okabinete oka ya mo nee oshivike sha dja ko ndee taka yandje elombwelo koministeli younamapya i kaleke otendela ei.
Ashike nee, oshinima shinene apa osheshi kutya Okabinete, natango, oka fa taka ningi omatokolo opakafimbo okwaamena oshiwana oo tashi dulika a lyatele pedu efimaneko lomahangano oshiwana.
Opo oThe Namibian iha lundilwe kutya otai amene America waDonald Trump oo wokulinenepeka, kashi na sha noshilongo oko kwa dja ehangano.
Ongomulandu, Okabinete inake lidopa momatokolo okukonga oipumbiwa yepangelo kutya elalakano lako oliwa shi fike peni.
Nena o6th Grain.
Mongula otashi dulika shi kale ehangano ile otendela ya yooloka, nOkabinete take liufa komapopyo opapolitika ile oshiwana.
Ngee oshinima eshi osha tambulwa ko, ovanapolitika itava ka dula vali okukelelwa vehe lidope momatokolo okukonga oipumbiwa yepangelo.
Loo eli olo etomeno oThe Namibian natango kwa li ya holola omalimbililo eshi Okabinete ka lombwela onguduwiliki yaMeatco i shune moilonga omukulunhuwiliki wayo mukulu Mwilima Mushokobanji konima ewilikongudu la hoolola liha wedele oshikako shaye konima she ya pexulilo odula ya dja ko.
Ngee omalombwelo Okabinete itaa landula omilandu ile taa pitilile eenguduwiliki odo da ulikwa, ohashi nghundipike ewiliko lomahangano nokuteya efinamhango noilonga yopauyuki.
Elidopo moinima lopapolitika otashi dulika yo li ete oumbada wokuninga omatokolo momahangano epangelo nomeeministeli shaashi otashi dulika a tameke okulipula ngee omatokolo ee li ngaa mondjila, pakupopya oshili, osha ninga efimbo lokuefa eenguduwiliki di ninge omatokolo puhe na okupiyaanekwa papolitika.
Opo pa monika epuko moilonga ile momatokolo, opu na omilandu odo di na okulandulwa ndee kashi shii omatokolo Okabinete inaa konakonwa.
