Eleledoolopa lEenhana ola futa eengunga dalo di dulife peemiliyona N$13 kehangano lomeva laNamibia ledina Namibia Water Corporation (NamWater).
Mayola wodoolopa yEenhana Omri-Onn Kavandje Etitatu okwa ti oshinima eshi osha kula, melitulemo lelelodoolopa mokuwilika nawa oshimaliwa nomokulela pamufika.
“Onda hafa unene okushiivifa kutya okufuta eengunga daNamWater okwa kala oshinima sha fimana okudja ngaa eshi nda ya mombelewa, nondi udite etumba kutya otwa hanga ondjodi ei nawa mangha oshikako shetu shomido nhano inashi pwa ko,” osho a ti ngaho.
Okwa weda po kutya oshinima eshi edidiliko la yela lelitulemo lelelodoolopa melongo lopauyelele nelelo liwa.
Kavandje okwa holola kutya efuto leengunga daNamWater onghatu ya kula mokuxwepopeka onghalo yoshimaliwa shodoolopa, ta ti kutya elelodoolopa ole shi pondola okuninga oshinima eshi okupitila meduto lomilandu dipe nosho yo pamatokolo a talwa nawa opashimaliwa.
Ashike nee, omangha eshi shi li oshinima shiwa shi liwetikile, Kavandje okwa ti natango ova taalela omaupyakadi akula mokumona eengunga di dulife peemiliyona N$50 delelodoolopa di li kovakwashiwana nomahangano.
Okwa ti kutya oshimaliwa shi dulife peemiliyona N$7.8 sheengunga edi eengunga deembelewa depangelo, eeministili nomahangano.
“Onghalo ei otai i moshipala elelodoolopa li dule okuwanifa po eemumbwe dalo dopashimaliwa komahangano oko li na yoo eengunga notai kateke eyandjo lomayakulo,” osho a ti ngaho.
Okwa indila nee kovakalimo vomEenhana opo va kufe ombinga meyokomesho lodoolopa pakufuta omayakulo amuni pefimbo.
“Okufuta omayakulo amuni kaku shi ashike okuwanifa oveta – oshinakuwanifa shoshiwana osho hashi pitike elelodoolopa li twikile nokuyandja omayakulo a fimana nokutula moilonga eeproyeka da pumbiwa,” osho a ti ngaho.
Kavandje okwa ulika elitulemo lelelodoolopa kekwato nawa loshimaliwa nokwa pula ovakufimbinga aveshe, mwa kwatelwa ovakalimo, eengeshefa nomahangano epangelo, va yambidide eyambulepo lodoolopa pakufuta eengunga davo nopakukundafana nawa nelelodoolopa.
Moshiningwanima shikwao sholudi eli, ongudu yoilyo yoSwapo yovayelele yokoTsumkwe Etine oya li ya yandja omukanda kuhamushangandjai Sophia Shainingwa i holole eudo layo lonai kombinga yomahoololo omafiku aa oitai noikandjo.
Ongudu otai ti ovayelele inava pewa eemhito opo va kufe ombinga meemhito donhumba mongudu.
-NAMPA
