Elelodoolopa lEenhana ola pewa elombwelo li kalele po eemiliona odo da nanwa ovakalimo sha pitilila ndee tali shunifa oimaliwa yovanhu.
Okomitiye yOmutumba wOpashiwana i na sha noimaliwa yepangelo oya pula elelodoolopa li koleke omavalulo omayakulo ovakalimo ndee tali kwashilipaleke kutya oimaliwa yovakalimo ovo va nanwa epuko oya shunifwa.
Oshinima eshi osha landula oinima inai yela ya tofwa molopota yomuvalulidingi yomudo 2023 i na sha noipambele yoshimaliwa yelelodoolopa, oyo ya talululwa pefimbo okomitiye kwa li ya talela po odoolopa Etitatu.
Oidjemo yomavalulo otai ti, elelodoolopa ola didilika oimaliwa i dulife peemiliona N$3.32 moishoshela ya nanwa ovakalimo ovo ve na eengunga, omanga oishoshela oyo ya teelelwa i na ashike okukala i fike poN$493 995, pu na eyooloko leemiliona N$2.8.
Oshinima eshi osha eta ovanapaliamente va pule va fatululilwe nokupewa ouyelele ngee ovakalimo ova nanwa sha pitilila.
Omukulunhuwiliki wodoolopa yEenhana Wodimbo Haulofu okwa ti ovakalimo ovo va hangika va nanwa shihe li mondjila oimaliwa yavo oyo otai tulwa komavalulo avo omayakulo.
“Ihatu shunifa oimaliwa keemhuma, ashike ohatu i tula komavalulilo ngee otwa mono kutya omunhu okwa futa oimaliwa ya pitilila epuko,” osho a ti ngaho.
Haulofu okwa ti oimaliwa yelelodoolopa oyo ya li meendjo, kwa li i li nale lwopeemiliona N$4, paife oya shuna pedu noya fikama poN$400 000 paife, osho ta ti osha etwa keenghendabala dokwoongela eengunga.
Oshilyo shokomitiye yOmutumba wOpashiwana Michael Mwashindange okwa holola eudonai eshi elelodoolopa la kala nokudopa okuyandja omikanda doshimaliwa.
“Nande ngeno owa pewa ombedi, oshi li nawa. Oto dulu oku shi longa mo.
Ashike okukala i tamu yandje ouyelele kashi li mondjila noshi li etukano koshiwana.
“Okulipopila shaashi omwa dopa okuliufa koveta inaku tambulwa ko. Liufeni koveta,” osho a ti ngaho.
Oshilyo shokomitiye Sharonice Busch okwa lombwela oThe Namibian Etitano kutya osho sha lombwelwa elelodoolopa komuvalulidingi oshinima shii neenghono.
Busch okwa ti omuvaluli okwa ti ina mona ouyelele wa wana a dule okuyandja omadilaadilo aye kombinga yoshimaliwa shelelodoolopa, osho she shi ninga shidjuu li mone kutya ola fikama lela peni pashimaliwa.
Okwa ti kutya oshinima eshi osha ulika omukundu wakula momalelodoolopa nomalelo oitopolwahoololo wokuliufa komilandu domavalulo oiniwe yopashiwana.
“Otwa pumbwa okutala kutya omolwashike omalelodoolopa noitopolwahoololo ihapu itai liufa komilandu,” osho a ti ngaho.
Busch okwa ti oidjemo yomavalulo ye lifa, mwa kwatelwa oikumungu yeengaba domadu nomandoloma oimbodi, oya holola oupyakadi wakula womalelo.
“Fiyo opapa elelodoolopa laHangwena ashike li na oinima ya yela, akwao aeshe oinima yao inai yela,” osho a ti ngaho.
Oshilyo shokomitiye Inna Hengari okwa holola omalimbililo kombinga yonghalo yonhele yokweekela omakako.
Hengari okwa ti ovataleli ovo va talela po onhele oyo ova hanga iha di, nodalate oya kulupa, omuvelo owa teka po noimbodi okwa li ya halakana kondje yoluumbo.
Etoto oli li popepi nomaumbo nedimba olo tali di omo ola nyika oshiponga koundjolowele.
Hengari okwa ti onghalo yetoto oya eta yoo needi dihapu modoolopa.
