Oministili younamapya nounaimuna, omeva nomatendululo omadu oya ti efundja olo li li koshitopolwahoololo shaZambezi ola ninga okupombela oshipaxu osho she liteyela omapya kudjuu.
Oshipaxu osho she liteyela oshitopolwahoololo shaZambezi otashi piyaaneke eteyo, shaashi osha ponokela oikunomwa ihapu momapya neenhele doulifilo, unene ngaa moMuyako, Chinchimani noMasokotwani, okudja muJanuali.
Omupopiliko woministili younamapya nounaimuna, Romeo Muyunda momukanda wokoikundaneki wa pitifwa Etivali okwa ti kutya oministili oye shi pondolo okupombela eehecta di li 7 124 domeehecta di li 32 896 odo da ponokelwa koshipaxu.
Ashike nande ongaho, okwa weda po kutya okupombela oko kwa ningwa keengudu dokolupadi noudila vomombada okwa li kwa kalekwa muMaalisa molwefundja.
“Eenghendabala dokupombela oda twikila fiyo opetameko laMaalisa nokudja opo oda piyaanekwa kefundja olo li li moshitopolwahoololo omo paife. Otwe lineekela okutameka okupombela oshipaxu ngee omeva efundja a shuna pedu opo tu dule okupita tu ye keenhele odo da kumwa koshipaxu,” Muyunda ta ti.
Okwa ti eenhele doulifilo woimuna oda dengwa nai koshipaxu.
Oministili oya pombela eehecta deenhele doulifilo di li 4 355 neehecta domapya di li 2 769.
“Ohatu konakona onghalo.
Ovanailonga vetu otava twikile nokukundafana novanafaalama va yandje ouyelele kombinga yoshipaxu, oku shi kelela nefimbo olo ovanhu noimuna ya pumbwa okukala kokule neenhele odo da pombelwa,” osho a ti ngaho.
Muyunda okwa ti kutya oministili oya longifa eelita domiti di li 13 151, odo ta ti inadi nyika oshiponga komudingonoko.
“Omiti odi li nawa mokudenga oshipaxu noipuka ikwao ngaashi oyo kwa li ya monika momapya ovanafaalama,” osho a ti ngaho.
