epangelo otashi dulika li kale noshinakuwanifa shokupalwifa ovakalimo ovo va kumwa kefundja noshipaxu moshitopolwahoololo shaZambezi fiyo etoyo tali landula.
Eshi osha popiwa kuminista womayambulepo eedoolopa nomayambulepo oitopolwa yokomikunda, James Sankwasa.
Efudja noshipaxu osho shi li koshitopolwahoololo shaZambezi paife ngaha osha teyaula po eehecta dihapu doikunomwa yovanhu moshitopolwahoololo, osho sha eta eefamili di kale da taalela ondjala shaashi kadi na vali eshi tadi likola.
Oshitopolwahoololo shaZambezi osha taalela paife efundja li nyanyaleka, unene ngaa moshikandjohoololo shaKabbe South/North, la fiya omikunda, eefikola, eekilinika neepate di li koshi yomeva.
Efundja eli ola tembula eefamili, novanhu ve dulife po2 000 ova tembulilwa nale keekamba di li omuwoi.
Ondodo yomeva momulonga waZambezi oi li peemita di li 6.89.
Sankwasa, oo kwa li a ka talela onghalo koshitopolwahoololo oshivike sha dja ko, okwa ti kutya onghalo yoikulya moshitopolwahoololo oya fiwa monghalo ii neenghono koinima ei.
Okwa weda po kutya epangelo nali tale kutya otali palwifa ngahelipi ovakalimo ovo va kumwa konghalo ei fiyo va dula okulixupifa vene.
“Omapya ovanhu ee li koshi yomeva, osho she va fiya vehe na eshi tava teya.
Epangelo inali tala ashike ovanhu ovo ve li meekamba. Ovanhu ava otava ka pumbwa eembuto moshikando tashi landula.
Nande epangelo itali dulu okuyambidida ovanhu aveshe ovo va kumwa konghalo ei, ola pumbwa okukufa ko oshipambu shakula.
Eengobe nado oda kumwa konghalo ei nai, shaashi kapu onhele youlifilo. Onghee nee, epangelo nali yandje oikulya yado,” osho a ti ngaho.
Sankwasa okwa popya kutya eehecta di li 50 depya laye odi li koshi yomeva doo oda ponokelwa koshipaxu, nande oikunomwa natango inai hanga okuteywa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
