Minista wOmayambulepo Eedoolopa nOmikunda Jamses Sankwasa okwa londwela kutya oinima kai li vali ngaashi ya kala.
Ta londwele omalelo oitopolwahoololo a xwepopeke etulomoilonga leepoloyeka ndee taa kwashilipaleke kutya oshiwana osha mona omauwa okudja meedjo dasho.
Etumwalaka eli okwa li la yandjwa ponhele yaye komupedu minista Evelyn !Nawases-Taeyele pepatululo loshoongaleleilonga shokomudo shomatalululo nomafaneko eyambukepo koSwakopmund Omaandaxa.
Sankwasa okwa holola omalimbililo kombinga yeepoloyeka inadi pwa, oimaliwa yomayambukepo inai longifwa nomandiki omayambukepo okomikunda.
“Omafiku okuninga eshi mwa hala aa pwa ko. Okudja nena, okulonga okwa fimana, oimaliwa nai yukifwe komalelo oitopolwahoololo oo taa ulike omafaneko awa, omaduto nomatulomoilonga a nuka po,” osho a ti ngaho.
Eepoloyeka domatungo, mwa kwatelwa eefikola, omatungo oshiwana neepolohalama domeva nadi kale tadi kandula po omikundu nokuyandja omauwa taa kalelele koshiwana, osho a weda po ngaho, manga yo ta pula ovanailonga vepangelo va longe noushili, ekalelepo loinima nelongo lopauyelele.
“Omalelo oitopolwahoololo ee na oshinakuwanifa shokukwashilipaleka kutya eepoloyeka domayambukepo oda manifwa pefimbo noimaliwa oyo ya nuninwa omayambukepo oya longifwa i xwepopeke eenghalamwenyo doshiwana,” osho a ti ngaho.
Sankwasa natango okwa popya kutya epangelo ola yandja oimaliwa yeepolohalama da shanakulya oshanakulonga, ta ti opolohalama otai lalakanene okuyandja oiyemo yopakafimbo nokuyambidida omaumbo oo e li moluhepo.
Okwa ti oshoongaleleilonga oshe ya pefimbo la fimana eshi epangelo tali talulula Omulandu wOmayambulepo kOmikunda, tashi yandje omhito kovakufimbinga va paafane omayele nokupopila omilandu odo tadi nghonopeke omayambukepo eepolohalama dokomikunda.
Okwa ti vali oshoongaleleilonga inashi talulula ashike eyokomesho ashike nashi fininike yo ovakufimbinga va tofe mo oinima oyo tai xwepopeke eyandjo lomayakulo nokuungaunga neemumbwe doshiwana.
Oshoongaleleilonga otashi pitike epangelo li kwashilipaleke kutya eepolohalama domayambukepo okomikunda otadi longo, otadi toto eemhito doilonga noiyemo, otadi longo oikulya, tadi ninipike oluhepo komikunda nokuyandja omayakulo.
–Nampa
