Evava lovanyasha loSwapo ola pula Elelo lOshilando nomalelo akwao eedoolopa a xulife po okutaataya ovalandifi vomomapandaanda ndee ponhele yaasho taa toto po eenhele dowina opo tava dulu okulandifila paveta ndee tava mono oiyemo.
Hamushanga wevava lovanyasha Ephraim Nekongo okwa ti okunyeka ko oinima, okukufa po nokuhanauna po oinima yovalandifi ava inaku kala omulandu wokunghonopeka omilandu doomuni.
“Ovalandifi vomomapandaanda onghee nee inava talika ko va fa ngeno tav i moshipala eyambukepo leedoolopa, ashike ovakufimbinga meliko novanangeshefa yo,” Nekongo ta ti.
Evava lovanyasha loSwapo ola pula omaledoolopa a xulife po omukalo wokufininika ovanhu ndee taa tameke okutala nghee e na okuyambidida ovanhu ava va landife oinima yavo.
Ola ti omalelodoolopa naa tote po eenhele dopamufika dokulandifila di na omayakulo ngaashi omeva, oundjuwo, olusheno, eenhele dokukupula omakako, eemhungulilo neameno manga yo taa kwashilipaleke kutya ovalandifi ove li peenhele opo tava dulu okumona ovalandi noupu.
Nekongo okwa ti omalelo naa fimaneke eenghundafana ndee taa yandje eemhito da wapala kovalandifi ve liufe keemhango manga inaku kufwa onghatu tai dengele.
“Okunyeka ko nokuhanauna po inaku kala nandenande omukalo tau dengele wokuwilika oinyangadalwa yeliko ihe li paveta,” osho a ti ngaho.
Evava lovanyasha loSwapo ola ti elalakano nali kale okutula pamufika okulandifa oku manga yo taku yandjwa eemhito kovalandifi, unene ngaa Ovanamibia ovanyasha, va dule okuyambula po eengeshefa davo.
