Eengulu dofikola tadi lokelwa moshitopolwahoololo shaHangwena nOshikoto otadi twikile nokupiyaaneka okuhonga nokulihonga shaashi eetundi natango otadi ningilwa ashike momatwambe a ningwa noipeleki.
Ovakulunhufikola ova ti kapu na oimaliwa yokutunga eengulu dopamufika nomilandu tadi ngabeke oda kateka okutunga eengulu dofikola daalushe.
Ofikola yedina Namhadi yaMwelihanyeka Primary School momukunda Oshushu, moshikandjohoololo Okongo, oyo i na ounona ve li 149, oya kala ashike i na eengulu dofikola dopamufika di li mbali nghee ya totelwe momudo 1992.
Oi na ondodo yotete fiyo onhihamano, neengulu dihapu oda ningwa noipeleki.
Omukulunhufikola Eino Kakonda okwa ti ova ile koministili va ka konga evatelo. Ashike nee, okwa li va lombwelwa kutya kapu na oshimaliwa.
Kakonda okwa ti ounona ohava longelwa koshi yomatwambe oipeleki, onghalo oyo a ti “kai wa” shaashi oipeleki ohai talala pefimbo loutalala yoo tai ndjene pefimbo loupyu, omangha onhele hai kala yoo omhepo yamhatutu.
“Otwa shanga omikanda dihapu da yuka kombelewa yehongo. Ova ti otave tu nyamukula ngee pwa monika oshimaliwa.Otu na elao shaashi otu li momufitu eengulu ihadi mono efundja,” osho a ti ngaho.
Ashike nee, okwa weda po kutya eengulu natango ohadi lokelwa luhapu.
Betrice Kaulya, omuhongi wondodo onhivali nonhinhatu, Omaandaxa okwa ti iha longele mongulu pefimbo loupyu shaashi ihamu kala omhepo ya wana.
Okwa ti okunateka nokutulika oikwafifohongo ikwao ihaku shiiva shaashi omutenya okudja koipeleki ohau imbi eengha dikwate.
“Otwa indila omukulunhu wehongo oikando ihapu, ashike omanyamukulo alushe ihaa kala awa,” Kaulya osho a ti ngaho.
Omukulunhu wehongo Isak Hamatwi kakwa li nande a monika opo a tye sha kombinga yoshikumungu eshi.
Onghalo ei oya faafana naayo yokofikola yedina Onaluthipa Primary School moshikandjohoololo Eengodi oko eengulu tadi lokelwa pefimbo lodula.
Ofikola oi na ashike ounona ve li 70, osho omukulunhufikola Esther Haukena osho etomeno ofikola itai mono omatungo eengulu dofikola aalushe.
Okwa ti, oministili ihai tungu eengulu dopamufika ngee ofikola oi na ashike ounona vashona.
“Ondodo ashike yotete nonhivali i na eengulu dopamufika, vakwao ove li meengulu doipeleki.
Ovadali ova tunga ongulu imwe,” osho a ti ngaho.
Ofikola oi na okudja pondodo yopetamekoelela fiyo opondodo onhinhe.
Omukulunhu wehongo wopashitopolwahoololo Hilma Nuunyango-George okwa ti onghalo ei oku i shii nofikola ei otai ka talwa ngee pwa monika oimaliwa. Ashike nee, okwa ti eengulu tadi lokelwa kakwa li e di lopotelwa.
“Omutengenekwafaneko inau wana okuvatela eefikola adishe. Otwa pumbwa eengulu dofikola di dulife po400 moshitopolwahoololo shaShikoto,” osho a ti ngaho.
Omupedu kulunhuwiliki weefikola nehongo lopambelewa Edda Bohn okwa ti oministili oya tula ombuda moshixwa mokukandula po omikundu edi nokutota omidingonoko di na eameno nokutunga eengulu deefikola dipe nosho yo eefikola.
“Opu yadi eefikola di li ngaho ashike kandi na omwaalu wado paife ngaha … opu na eengulu deefikola di li lwopo2 000 dihe fi daalushe,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
