Eengudu domilameno inadi hala omunambelewa a kula wOkomisi yOmahoololo yaNamibia Gerson Sindano a ninge omunashipundi wokomisi, tadi ti kutya ekwatafano laye noSwapo otashi dulika li ke lidope moilonga yaye.
Oshikako shaSindano otashi xulu momafiku 21 Juni 2027 ashike okwa ulikwa kupresidente Netumbo Nandi-Ndaitwah a ninge a pingene po Elsie Nghikembua oo e li omunashipundi wokomisi paife, ashike oshikako shaye otashi ya pexulilo momafiku 16 Septemba.
Ovanambelewa vakwao ovo va hoololwa ovo, Emmerentia Leonard naJulieta Ferreira.
Eengudu domilameno otadi ti oilonga yaSindano ikulu eshi a li omuyambididi wopaumwene wahamushangandjai mukulu woSwapo Nangolo Mbumba momudo 2013 oya eta omalimbililo kombimga yelifikameno lokomisi eshi sha yuka komahoololo omudo 2030.
Presidente wongudu yoNational Democratic Party, Martin Lukato okwa ti ita yambidida omuulikwahoololwa e na ekwatafano nongudu tai pangele.
“Pauhongelwe nopailonga oinima yaye kai na oupyakadi.
Ashike ngee okwa twikile nokukala oshilyo shoSwapo, itandi yambidida omuulikwahoololwa oo oilonga yaye tai dulu okukala i li olwaamambinga,” Lukato ta ti.
Okwa ti eshi eengudu domilameno tadi pula ominute nomukanda woindjemo yokakonakono koilonga oda hala okutala ngee oinima aishe oya ningwa pamulandu.
Lukato okwa weda ko kutya ota popile ashike Sindano ngee okwa xulifa po oukwashilyo waye woSwapo.
“Ondi wete kutya omahangano aeshe epangelo naa kwatelwe komesho kovanhu vehe shi ovanapolitika opo ku amenwe oushili womahangano,” osho a ti ngaho.
Omupopiliko wongudu yoLandless People’s Movement Lifalaza Simataa okwa ti ongudu oi na omalimbililo ngee omulandu wokuhoolola okwa li ngaa u li pauyelele.
“Molwekwatafano laye, okupula ominute nomukanda woidjemo okwa fimana. Itatu dimine omunhu e na ondjokonona yopapolitika i li ngaho a kwatele komesho ehangano olo li na nale oushili tau nyikwaanyikwa okudja ngaa pomahoololo a dja ko,” Simataa ta ti.
Presidente wongudu yoAll People’s Party Ambrosius Kumbwa okwa ti eanyo longudu kali na sha naSindano yeemwene ashike oli na sha nomulandu wa longifwa.
“Eanyo letu kali shi eponokelo laSindano, ile pamwe ngeno louhongelwe waye ile oukwatya,” Kumbwa ta ti.
Okwa ti otava pula ashike ouyelele wa dingilila euliko eli manga inava ya komesho nekoleko.
