Eemhangu dopamufyuululwakalooda kufa ko eenghaku

… ovakwatingonga otava ka futa eengobe nhatu

Ovanhu ovo tava tamanekelwa ekwatongonga koitopolwa yomalelo opamufyuululwakalo konooli yoshilongo otava ka futifwa oshimaliwa shi fike poN$7500 ile eengobe nhatu moveta yopamufyuululwakalo.

Eshi oshe ya konima omalelo opamufyuululwakalo ahetatu kwa li a talulula omahandukilo oimbuluma ya yooloka.

Monakudiwa omukwatingonga okwa li ha futifwa oshimaliwa shi fike poN$3 000 ile eengobe mbali.

Omahandukilo ape, oo a ya moilonga mefiku 01 Marsa 2023, ovakwatingonga otava kala tava pewa ehandukilo loshimaliwa shi fike poN$7500 ile eengobe nhatu.

Omahandukilo aa a ningululwa otaa longifwa momalelo opamufyuululwakalo ngaashi Uukwaluudhi, Uukolonkadhi, Ongandjera, Ombalantu, Ombadja, Uukwambi, Oukwanyama nOndonga.

Edipao paife oli na ehandukilo loshimaliwa shi fike poN$25 000 ile eengobe di li omulongo, ashike nale oshibuluma eshi okwa li ashike hashi futilwa oshimaliwa shi fike poN$15 000 ile eengobe omulongo.

Ashike nee, ovakwapata vanakufya otava mono ashike eengobe omuwoi ile oshimaliwa shi fike poN$22 500, oshimaliwa ile ongobe ei ya shaala po otai pewa elelo lopamufyuululwakalo.

Ewapaleko lomahandukilo eli natango ola kwatela mo oimbuluma imwe.

Ovo tava tamanekelwa okulemaneka ovanhu otava kala tava pewa ehandukilo loshimaliwa shi fike poN$12 500, omanga okuteya omunhu eyoo ile okumudenga ombole ku na oshimaliwa shi fike poN$2 500. Okuyandja eteelelo komukainhu shihe li pahalo laye paife otaku futilwa oshimaliwa shi fike poN$5 000 ile eengobe mbali.

Okuyandja eteelelo komunhu e na oupyakadi wopamadilaadilo ile okukwata ongonga okaana ile okaana haka i kofikola, oku na oshimaliwa shi fike poN$7 500 ile eengobe nhatu.

Omulumenhu ou a nangala po omukainhu wovanhu a hombolwa ota futu N$7 500 ile eengobe nhatu, omanga omukainhu ngee okwa nangala nomulumenhu a hombola ota futu oshimaliwa shi fike poN$2 500.

Okutuka omunhu mukweni okudja komutwe fiyo opekoto oku na N$150, omanga okumutuka okudja pekoto fiyo okeemhadi, ku na ehandukilo loshimaliwa shi fike poN$250.

Hamushanga welelo lopamufyuululwakalo laNdonga Frans Enkali okwa lombwela oThe Namibian Etivali kutya omahandukilo okwa li a ningwa momudo 2014, ashike okwa li ashike a tulwa moilonga odula ya dja ko.

Okwa ti ovo ve li meembelewa inava ninga osho sha pumbiwa opo omahandukilo oo a lundululwa a ninge eeveta.

“Okwa li ashike e li momukalo wominute. Ito dulu okulundulula omunhu nominute, oto dulu ashike okumulundulula noveta,” Enkali osho a ti ngaho.
Enkali okwa ti omunhu ota pewa ehandukilo ngee ta pangulwa poveta yopamufyuululwakalo.

“Ngee omunhu okwa li nale a ya komhangu yepangelo, kapu na vali eshi tashi ningwa po, eshi okutya ashike ngee omunhu okwa monika ondjo komhangu yopamufyuululwakalo ove na okufuta oshikolo shovanhu shofamili,” Enkali osho a ti ngaho.