O
KOMMISSI yomahogololo ya Namibia oya ti ita yi ka iyutha komathiminko goongundu dhompilameno kombinga yembo lyomadhina gaahogololi, ndyoka dhimwe tadhi aniwa ina li yela nawa.
Omupopiliko gwokommissi, Marilyn Katjitundu okwa ti embo lyomadhina gaahogololi oshiwike tashiya olya nyolwa nale moshifo shepangelo na ita li vulu okulundululwa okushitalela mekemo nethiminiko lyongundu yo RDP noshowo RP.Omuperesidende gwaRP, Henk Mudge oshiwike shika okwa nyenyeta kutya aniwa omahogololo giitopolwa niilando oshiwike tashiya itaga ka kala ga manguluka noshowo geli nawa, omolwa aniwa epiyagano lili membo lyomadhina gaahogololi.Mudge okwa li a tilitha kutya yo ota ya dhiladhila okuya kohofa opo yi indike omahogololo gaaningwe oshiwike tuuka. Oompilameno otadhi nyenyeta dha geya oshoka ompangu yopombanda ina yi gandja etokolo lyayo moshinima shomahogololo ga Novemba omumvo gwayi, ngoka oongundu ndhika dha tile oga yakwa nenge oga fukilwa.Oya hala omupanguli peresidende, Petrus Damaseb nomupanguli Collins Parker ya gandje etokolo lyawo komeho gomahogololo gometi 26 noshowo 27 lya Novemba 2010. Katjitundu okwa ti okommissi ita yi ti ko sha komatilitho ngoka.Oya ti kapena eindiko lyopahofa sigo oompaka. Okommissi oya ti yo ita yi yamukula komipopyo dhaana oshili.Sho Mudge a pulwa kutya ota ya ka gandja uunake oombapila dheindilo dhawo kompangu, okwa ti kapena esiku lya ulikwa natango.Oongundu odhina ethimbo sigo esiku lyomahogololo oku ninga eindilo ndyoka.Katjitundu okwa ti oya kundathana noongundu adhihe dhopolitika kombinga yoshinima shembo lyomadhina gaahogololi. Kombinga yoshigongi Mudge okwa ti itashi kwatha sha oshoka yo oya kala yeshi enyenyeto lyetu kushika ndele kayena shoka ya ningi po. Katjitundu okwa ti yo oyi ilongekidha no ta ya dheula nale aanambelewa yokweenditha omahogololo, omanga iipumbiwa ayihe yomahogololo oya tuminwa nale komahala goku hogololela. Amushanga gwompangu yOpombanda, Elsie Schickerling okwa tile oongundu ndhika odhi ipyakidhila nopropaganda ndjoka ita yi ka pulakenwa kompangu.
