Cymot a shuna aanambelewa miilonga

YAALI yomaaniilonga mboka ya tidhilwe miilonga kongeshefa yoCymot Namibia konima sho ya nu oombiila dha pitilila pundhoka ya pitikilwa ya nwe pethimbo ehangano tali tyapula oshituthi shokilisimsa omvula ya zi ko, oya shunwa miilonga.

Pantumwafo ndjoka ya nyolelwa aaniilonga, ehangano olya ti olya talulula etokolo lyalyo noli ilongekidha okuuvathana naaniilonga, ihe otali shi ningi ashike ngele otaa shuna kiikundaneki ye ke li pe ombili e taa taamba ko ondjo yawo.

Pantumwafo, aaniilonga yaali otaa shunwa miilonga, gumwe ota pewa okapaki kethike pondjambi ye yoomwedhi mbali e ti itopoka nehangano, manga omuniilonga omutine a tinda okuuvathana nehangano moshinima shika.

Shika aaniilonga otaa shi gwanithilwa po ashike ngele oya zimine ondjo yawo yokwaanuuyuuki, ano yi ihempulule kutya oya kutha omalovu mehala lyehangano nelalakano, yo taa shuna wo kiikundaneki ya zimine ondjo yawo opo kwaa landulwe omahokololo gomusheko ngoka ya popila ehangano konima sho lye ya tidha miilonga.

Oshiwike sha zi ko, onzonkundana ndjika oya lopotele kutya aantu yane oya kanitha iilonga koCymot Namibia, sho ya nu oombiila dha pitilila pundhoka ya li yu uthilwa yanwe pethimbo lyopaati yehangano yokilisimesa moshilandopangelo shaNamibia, okuuka lwopehulilo lyomvula ya zi ko.

Nando ongaaka, omukuluntuwiliki gwoCymot Namibia, Axel Theissen, montumwafo ndjoka a nyolele konzonkundaa ndjika, okwa ti aaniilonga oya kawula onyanga noya yona oshinima oshinene.

Okwa ti aaniilonga oya kambadhala okukutha omaliko gehangano, ano iikolitha, mehala lyiilonga yawo, nando oya lombwelekeka kutya kapu na nando oshikolitha shi na okukuthwa mo.

Theissen okwa tsikile ko ta ti ehokololo lyonzonkundana ndjika kali li mondjila, molwashoka omekende giikolitha ngoka Cymot a kwata ko okwa adha inaga patululwa.

Omukalelipo gwaaniilonga mehangano lyaaniilonga, Thomas Hambunda, okwa ti okwa nyanyukwa sho aaniilonga yaali ya shunwa miilonga.

“Eeno, yaali oya li ya pewa oombaapila mo12 Febuluali. Otwa pandula shaashi oya shuna miilonga, oyo aavali naasilishimpwiyu yomagumbo gawo.

Omutitatu oku uvathana nehangano, nomutine ina hala okushuna koCymot. Inandi hala manga okupopya oshindji, ihe itatu mana okulwitha omahangano ngoka gu uvite kutya otaga longitha aaniilonga ngaashi ga hala e tage ethiwa ashike. Shika hasho oshikando shotango tandi longo naantu ya tidhwa miilonga shaa li pauyuuki komahangano ngaashi Cymot,” Hambunda ta popi nomuthindo.

Otwa nothelwa ko wo kutya aaniilonga yaali oya shunwa miilonga molwashoka Cymot okwa dhimbulula kutya ine ya tidha pauyuuki.

Nakutunothela ko okwa ti aakiintu yaali [mboka ya tidhilwe miilonga] kaya li nando ye na ondjo, ye mwene gwoshihauto okwa zimina ondjo.

Konima sho oshikundaneki sheni she ya thina omayakulo, omuhokololi ta ti, oya ngwangwana noya tokola ye ya shune miilonga.

Okwa tsikile ko ta ti Cymot okwi igilila okutidha aaniilonga.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.