China okwa kala kaume kopaipindi kaNamibia okudja nalenale, ashike opa kala ngaa pu na omalimbililo kutya oinima aishe oya fa ashike i li mouwa waye.
Kapu na malimbililo kutya China, ngaashi naana oilonga ikwao ya kula, ota lalakanene ashike omauwa aye.
Ondjokonona yaye moilongo ikwao hayo naana i shii okutangwa, mwa kwatelwa omapopyo okuteya omaufemba ovanhu nokuhekela oilongo oyo opo tai putuka menono neengunga ngaashi Pakistan naSri Lanka.
Shoo osho u wete elalakano letalelepo lapresidente Nandi-Ndaitwah moChina okukonakono osho Namibia ta dulu okulihonga kuChina.
Presidente oku li mondjila eshi ta ti Namibia ne lihongele kuChina moikondo ngaashi shoungoba, ounamapya nounaimuna, oikwanghono noikondo ikwao oyo tai dulu okuyambula po eliko.
Ashike nee, ngee kapu na eshi she lihongwa ko nokutulwa moilonga oshinima eshi otashi ningi ashike olweendo longaho lokondje yoshilongo lovanapolitika novanawino.
Pakutala nawa, omunhu oto lipula kutya elalakano lokweenda nongudu yOvanamibia ve dulife po200 ola shike.
Ongudu yovanhu ve fike opo otai dulu okulundululila olweedo lopambelewa metalelepo longaho li li komapepe epangelo.
Eenghundafana doshili doilongo oyo opo tai putuka ohadi ningwa nawa, okupitila meenghundafana da shoneka oikondo yonhumba tadi lalakanene oikwafaabulika yopashiwana, ashike ihadi ningwa okupitila meeshaala doyoongalele di hadi ovanhu tava kongo oiyemo yopangeshefa yopaumwene.
China okwa ti okwa yandja oimaliwa keepolohalama tadi lalakanene okududa mo oluhepo nokuyambula po ovanailonga.
Okupitila meepolohalama davo doikwafaabulika, China okwa tunga eefakitoli doshiwana.
Ashike ngee owa tale nawa, ekwatafano lopaipindi pokati koilongo ei ivali ola dja nale ashike natango oli na sha ashike nokututa oinima moshilongo.
Namibia oha tumine eedjo dopaushitwe koChina inadi ngushupalekwa, ashike yee oha lande ko oinima ya pwa okulongwa nomashina.
